Były deputat Viarchoŭnaha Savietu i pałaty pradstaŭnikoŭ Volha Abramava pierad čarhovymi parlamenckimi vybarami raspaviała pra toje, jak falšavalisia vyniki vybaraŭ pa jaje mienskaj akruzie № 108 na papiarednich vybarach — u 2008 hodzie. Detali padziejaŭ, pra jakija deputatka maŭčała 4 hady.

Volha Abramava ciapier na pensii, apošnija hady šmat času pryśviaciła svajoj ciažka chvoraj maci. Aprača taho, jana piša analityku dla zamiežnych instytutaŭ i ŚMI.

Adbyłasia devalvacyja instytutu vybaraŭ

Spadarynia Abramava sočyć za ciapierašniaj vybarčaj kampanijaj i jak palitolah fiksuje padzieńnie cikavaści i hramadztva, i ŭłady da vybaraŭ, źnižeńnie jakaści kandydataŭ:

«Adbyłasia poŭnaja devalvacyja instytutu parlamentaryzmu i instytutu vybaraŭ. Heta dyjahnaz».

Dziejańni biełaruskaj apazycyi ŭ časie ciapierašniaj kampanii, kali adny vystupajuć za bajkot, a inšyja za ŭdzieł, spadarynia Abramava nazyvaje depresiŭnymi pavodzinami:

«Heta nastupstvy toj frustracyi, jakuju apazycyja adčuła ŭ 2010 hodzie pa vynikach prezydenckich vybaraŭ, heta stan pryhniečanaści i adčaju, sproba niešta rabić u najciažejšych umovach bieź jakoj-kolviečy nadziei na vynik i navat na pramiežkavuju pieramohu. Ale heta lepiej, čym ničoha».

U takich umovach spadarynia Abramava ličyć lahičnym skasavać instytut vybaraŭ ci prynamsi skaracić kolkaść deputataŭ:

«Prynamsi, adbyłasia b ekanomija dziaržaŭnych srodkaŭ. Zatraty na vybary nieadekvatnyja vyniku. Pavodle suadnosin cana-jakaść nie prachodzić… Vy b taki tavar nie kupili, kali b vam prapanoŭvali ŭ volnym kankurentnym prodažy».

Volha Abramava kaža pra nadzvyčaj nizkuju cikavaść hramadzian da ciapierašnich vybaraŭ i prahnazuje, što 23 vieraśnia jaŭka ŭ cełym składzie kala 50 pracentaŭ, ale buduć akruhi, dzie jaŭka nie składzie i 40 pracentaŭ. Astatniaje prypišuć, pierakananaja Abramava.

U 2008-m na Abramavu cisnuli Piatkievič i Paŭłaŭ

Technalohii i mechanizmy falsyfikacyi vybaraŭ dobra adpracavanyja, kaža Volha Abramava: kali ŭ 2000-m hodzie pieravažała ŭkidvańnie biuleteniaŭ, to ciapier niama i takoj patreby, asabliva paśla taho, jak było ŭchvalenaje rašeńnie zachoŭvać biuleteni paśla vybaraŭ nie 4 hady, a tolki paŭhoda. Heta prałabijavali rehijanalnyja načalniki, jakija ŭsio ž pabojvajucca hipatetyčnaj adkaznaści.

Volha Abramava kaža, što zaznała dziejańnie mechanizmaŭ falsyfikacyi na ŭłasnym dośviedzie padčas vybaraŭ 2008 hodu.
Na toj čas jana była dziejnym deputatam užo try sklikańni i mieła ŭ akruzie vialikuju papularnaść, asabliva paśla taho, jak prahałasavała suprać skasavańnia ilhotaŭ. Pavodle źviestak sacyjolahaŭ, jaje padtrymlivali tady bolš za 80 pracentaŭ vybarcaŭ. Pierad vybarami ŭłady pasprabavali «pierakanać» Abramavu admovicca ad balatavańnia:

«U červieni mianie zaprasiła ŭ administracyju Natalla Piatkievič. Razmova pajšła adrazu nastupnym čynam: «Volha Michajłaŭna, što vy chočacie ŭ jakaści kampensacyi za toje, što vy bolš nia budziecie deputatam?»

U mianie skivica advisaje, ja kažu «Jak?», a potym prychodžu ŭ siabie i pytajusia: «A jak vy heta sabie ŭjaŭlajecie?»

Volha Abramava tady zajaviła Piatkievič, što jaje adnosiny z vybarcami akruhi takija, što pieramahčy jaje ŭ sumlennaj baraćbie nia zmoža nivodzin kandydat, chiba što Łukašenka, i to nie abaviazkova. Ale Piatkievič nastojvała, i tady Abramava nazvała dźvie pasady, na jakija jaje apryjory nie pryznačyli b:

«Jana navat pakryŭdziłasia i skazała niešta nakštałt: nu, heta dla svaich.
. Nastupnym razam ja, kab zakryć temu, patelefanavała joj i skazała: «Davajcie budziem ličyć, što nijakaj hutarki ŭ nas nie było. Inicyjatyva była vašaja, i ŭ mianie nijakich pytańniaŭ da ŭłady niama».

Takich «niakiemlivych» deputataŭ u Miensku vyjaviłasia niekalki, i ich zaprasili da kiraŭnika Mienskaha harvykankamu Michaiła Paŭłava:

«Jon vymaviŭ sakramentalnuju frazu: „Pavinna być ratacyja. Tyja, chto byŭ deputatami dva i try razy, bolš deputatami nia buduć“. Pryčym jon skazaŭ heta ŭ prysutnaści vialikaj kolkaści čynoŭnikaŭ».

Volha Abramava paspračałasia i z Paŭłavym, i nie admoviłasia ad udziełu ŭ vybarach. Ale nieŭzabavie adčuła, što pačaŭsia cisk.
Źbiralnikaŭ podpisaŭ za jaje pierakonvali «nie marnavać času», bo Abramava ŭžo nia budzie deputatam, a dva pracoŭnyja kalektyvy, jakim jana jak deputat dapamahała, u apošni momant admovilisia jaje vyłučać:

«Adzin z kiraŭnikoŭ kliniki kaža: my nia možam hetaha zrabić, nam telefanavali z harvykankamu (dahetul pamiataju proźvišča hetaha čynoŭnika) i ŭ skrajnie hrubaj formie vykazali pahrozu źniać kiraŭnika, kali mnie budzie dadzienaja rekamendacyja».

Abramava jak dziejny deputat i kandydat nie zmahła sustrecca z kalektyvami 5 ustanoŭ na terytoryi svajoj akruhi. Tolki rektar Mastackaj akademii prysłaŭ list z vybačeńniami, inšyja navat nie adkazali. Abramava pierakananaja, što ŭ jaje vypadku rašeńnie prymali nie Piatkievič i nia Paŭłaŭ, a asabista Łukašenka.

U naziralnika byli dva roznyja pratakoły vybaraŭ

Kali padvodzilisia vyniki vybaraŭ 2008 hodu, źviestki ź jaje 108-j Kalinoŭskaj akruhi ŭ CVK pastupili adnymi z apošnich, navat zatrymali ahulnuju spravazdaču CVK:

«Ujaŭlajecie, jakaja tam była „niestykucha“, što, niahledziačy na daterminovaje hałasavańnie, im nie ŭdałosia źvieści kancy z kancami.
Tyja naziralniki, jakich pastaviŭ BCHK, i niekatoryja zamiežnyja naziralniki zafiksavali maju vialikuju pieravahu ŭ dzień vybaraŭ».

Paśla abviaščeńnia aficyjnych vynikaŭ vybaraŭ, pavodle jakich Abramava nabrała 24 pracenty hałasoŭ, a jaje mała kamu viadomy kankurent Mikałaj Kazak — 60, da Abramavaj pryjšoŭ mižnarodny naziralnik:

«Pry hetym jon skazaŭ: „Davajcie vyrašać, što budziem rabić. U mianie pramyja dokazy falsyfikacyj, my možam uzarvać usiu sytuacyju“.
Jon prynios mnie kopii dvuch pratakołaŭ — toj, jaki razdali naziralnikam paśla zakančeńnia vybaraŭ u asnoŭny dzień hałasavańnia, i toj, jaki jon zmoh vyrvać u staršyni akruhovaj kamisii na nastupny dzień, jaki pajšoŭ u CVK. Heta byli dva roznyja pratakoły».

Volha Abramava tady vyrašyła pramaŭčać. Tyja dakumenty paśla naziralnik addaŭ Lidzii Jarmošynaj.

Chaj ludzi pabačać, što jość inšaja dumka

Vybarcy sa 108-j akruhi ŭ 2008-m doŭha aburalisia, stvaryli navat arhkamitet dla zmahańnia za Abramavu. Ale jana vyrašyła nie zavastrać sytuacyju. Čamu?

«Jak i ŭ lekara, u mianie ŭ palitycy pryncyp: nie naškodzić. I tady ŭ mianie była nadzieja na „Ŭschodniaje partnerstva“. Ja vielmi spadziavałasia, što hety praces zrušycca, ja viedała, što kali ja raskažu ŭsio, što adbyvałasia ŭ majoj akruzie, to heta moža nehatyŭna adbicca na sytuacyi».

Volha Abramava hetak adkazała, čamu ciapier, praz čatyry hady paśla tych padziejaŭ, vyrašyła ahučyć hetyja fakty:

«Moža, paśla hetaj publikacyi, pa-pieršaje, na ŭzroŭni rehijanalnych uładaŭ ludzi choć pra niešta zadumajucca, chacia b pra svaju biaśpieku
— ja prychilnica taho, kab pačać zbor podpisaŭ za ŭniasieńnie ŭ Kryminalny kodeks źmienaŭ, kab žorstka karać za falsyfikacyi ažno da pažyćciovaha źniavoleńnia. I druhoje — ja apeluju da ŭłady: čaho vy baiciesia? Palityčny raskład siońnia taki, što ŭsio roŭna bolšaść budzie za vami. Pakul što. Uniasicie chacia b niejkuju kankurencyju ŭ parlament, zrabicie palityčny praces cikaviejšym, chaj ludzi pabačać, što jość inšaja dumka».
Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?