11 vieraśnia ŭ debatach pa telekanale «Biełaruś-2» uziali ŭdzieł kandydat u deputaty: staršynia Mienskaha harsavietu Michaił Savanovič, aktyvist hramadzianskaj kampanii «Havary praŭdu» Andrej Dźmitryjeŭ (davieranaja asoba kandydata ŭ deputaty Taciany Karatkievič) i kandydat, były staršynia Nacbanku Stanisłaŭ Bahdankievič.

Bahdankievič: «Ja biaru ŭdzieł u hetaj kampanii hałoŭnym čynam dziela praryvu ŭ 5-chvilinnych vystupach toj infarmacyjnaj blakady, u jakoj znachodzicca naša apazycyja, tak zvanaja „piataja kalona“. Hałoŭnaje, što patrebna, kab vybary byli lehitymnyja, — patrebna kab zachoŭvałasia Kanstytucyja. U joj zapisana, što nie dapuskajecca manapalizacyja ŚMI i cenzura. Adnak navat našy vystupy prachodziać cenzuru ŭ CVK. Heta hrubaje parušeńnie kanstytucyjnaj normy. Pa kanstytucyi palityčnyja partyi majuć prava vykarystoŭvać dziaržaŭnaje telebačańnie, radyjo, ŚMI. Adnak za apošnija 18 hadoŭ ja i maje kalehi pa apazycyi nivodnaha razu nie zmahli skarystacca hetym pravam».

Havoračy pra ekanamičnuju sytuacyju, Bahdankievič adznačyŭ:

«Trochmiljonny litoŭski narod sabraŭ sioleta 4 miljony ton ziernia biez nakačak i kamandaŭ, z ulikam demakratyi i rynkavaj ekanomiki. Niešta, vidać, nia tak u nas jość... My adstajom u dva razy pa zarobkach ad Rasiei i Litvy, u try razy ad Polščy. Ceny na charčavańnie ŭ Varšavie nižej, čym u Miensku».

Andrej Dźmitryjeŭ zapytaŭsia Michaiła Savanoviča adnosna palitviaźniaŭ u Biełarusi:

«Heta bje pa imidžy krainy, heta pieraškadžaje raźvivacca krainie, pačać pieramieny, heta vidavočna bje pa imidžy ŭłady. Pavodle apytańniaŭ, siońnia ludzi suprać najaŭnaści palitviaźniaŭ. Kali vas pryznačać u parlament, što vy kankretna zrobicie, kab nie było palitviaźniaŭ i ŭ krainie pačalisia pieramieny? Ci budziecie vy sadziejničać vypusku ich z turmaŭ?»

Savanovič: «U nas palitviaźniaŭ niama, jość kryminalniki».

Dźmitryjeŭ: «Jakija prosta dumajuć inačaj».

Savanovič: «Ja byŭ u śniežni minułaha hodu na płoščy i bačyŭ, jak tam usio adbyvałasia. Ja liču, što vielmi pravilna zrabili, što pryciahnuli da kryminalnaj adkaznaści asobaŭ, jakija šturmavali Dom uradu».

Bahdankievič: «Drenna ŭ krainie, dzie narod vyłučaje ź dzieviaci siem kryminalnikaŭ u prezydenty i potym ich sadžajuć. Niešta nienarmalnaje. Ja chaču, kab ludzi padumali».

Taksama Dźmitryjeŭ adznačyŭ, što Taciana Karatkievič adzinaja ź piaci pretendentaŭ ad «Havary praŭdu» zarehistravanaja kandydatam u Miensku.

Nastupnaje pytańnie Dźmitryjeva da Savanoviča:

«U 2011 hodzie da nas zaleźli ŭ kišeniu i ŭ try razy pamienšyli zarobki, dachody i ŭkłady, heta była devalvacyja. Ale pry hetym u parlamencie nie stvaryli kamisiju dziela raśśledavańnia hetaj spravy, nichto nie syšoŭ u adstaŭku, usio vydatna.
Jak vy ličycie, ci treba stvaryć takuju kamisiju? I jakija zakony nie byli pryniatyja ŭ minułym parlamencie, chto im pieraškodziŭ, kab takoha nie adbyłosia?»
Savanovič: «Usie zakony byli pryniaty prystojnyja, narmalnyja. I kazać, što tolki Biełaruś zakranuŭ kryzis — niapravilna. Kali Biełaruś, mahčyma, niedzie ŭ bolšaj stupieni, to heta nie aznačaje, što ŭ nas tak drenna».

Dźmitryjeŭ źviarnuŭsia da žycharoŭ Miensku: «Vy ŭsio cudoŭna viedajecie, vy viedajecie, što budzie pa vynikach hetych vybaraŭ. Vy viedajecie, što parlament nasamreč u toj čas, kali ŭ vas pamianšali dachody, sam pryniaŭ adzin zakon. Pra što? Pra ekanomiku, reformy, pieramieny? Nie. Heta byŭ zakon ab ekspedziravańni niečaha niekudy. Čamu? Bo parlament siońnia pradstaŭlaje nia vašy intaresy. Jon pradstaŭlaje čynavienskuju ŭładu, tvar jakoj daŭno čas mianiać. Va ŭładzie patrebnyja novyja ludzi z novymi idejami. Spadar Savanovič skazaŭ, što ŭ krainie niama palitviaźniaŭ, što ŭ turmach siadziać kryminalniki. Ja chaču pakazać ich partrety. Heta ludzi, jakija chočuć słužyć svajoj krainie. Ale ŭ ich inšaje bačańnie, tamu jany ŭ turmie».

Savanovič u svaim zaklučnym słovie adznačyŭ: «Siońnia vy pačuli kandydataŭ ad tak zvanaj apazycyi. Kaniečnie, možna kazać, što heta palitviaźni. Ale ja vyrazna bačyŭ taho ž Statkieviča, jaki kryčaŭ i zaklikaŭ iści na šturm Doma ŭradu».

Bahdankievič zaklikaŭ vybarcaŭ nie maŭčać, a zmahacca za svaje pravy, za zachavańnie ŭ krainie kanstytucyjnaj zakonnaści.
Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?