Delehacyja na čale ź pieršym vice-premjeram Biełarusi Uładzimiram Siamaškam znachodzicca ź vizitam u Azierbajdžanie. 30 kastryčnika z pradstaŭnikami Biełarusi sustreŭsia prezident Ilcham Alijeŭ,
paviedamlaje azierbajdžanski infarmacyjny partał www.trend.az. Baki vykazali zadavalnieńnie paśpiachovym raźvićciom adnosinaŭ Biełarusi i Azierbajdžana ŭ roznych halinach, u tym liku ŭ ekanomicy. Była adznačana značnaść sumiesnaha prajekta, jaki realizujecca na Hiandžynskim aŭtamabilnym zavodzie.
U intervju www.trend.az Siamaška paviedamiŭ, što da kanca hoda płanujecca pravieści ŭ Minsku biełaruska-azierbajdžanskibiźnies-forum, na jakim buduć abmiarkoŭvacca inviestycyjnyja prajekty ŭ roznych halinach ekanomiki.
«Upeŭnieny, što z ulikam dynamiki našych adnosinaŭ mierapryjemstva projdzie na vysokim uzroŭni. Spadziajusia, što dla azierbajdžanskich udzielnikaŭ forum stanie dobraj mahčymaściu aznajomicca z ekanamičnym patencyjałam našaj krainy, dazvolić naładzić karysnyja suviazi ŭ Biełarusi, jakija pasłužać pašyreńniu dziejnaści azierbajdžanskich kampanij za miažoj i umacavańniu biełaruska-azierbajdžanskaha partniorstva», — skazaŭ Siamaška.

Jon nahadaŭ, što ŭ 2010 hodzie padčas vizitu Alaksandra Łukašenki ŭ Azierbajdžan było padpisana pahadnieńnie ab zaachvočvańni i ŭzajemnaj abaronie inviestycyj, jakoje dało azierbajdžanskim inviestaram dadatkovyja harantyi ŭ Biełarusi. «Jašče adnym važnym stymułam dla prychodu azierbajdžanskich inviestaraŭ u Biełaruś stała stvareńnie Mytnaha sajuza Biełarusi, Kazachstana i Rasii, — adznačyŭ Siamaška. — Zaraz pierad inviestaram u Biełarusi adkryvajecca jomisty 170-miljonny rynak zbytu troch krain, jakija miažujuć adnačasova ź Jeŭrapiejskim sajuzam i Kitajem».

«My ŭžo adčuli rost zacikaŭlenaści azierbajdžanskaha kapitału ŭ pracy na terytoryi Biełarusi», — skazaŭ pieršy vice-premjer.
Pavodle jaho słoŭ, «značnuju cikavaść azierbajdžanskich kampanij vyklikaŭ dvuchbakovy inviestycyjny biźnies-forum z udziełam ministra ekanomiki Biełarusi Mikałaja Snapkova, jaki prajšoŭ u lutym 2012 hoda ŭ Baku». Siamaška taksama paviedamiŭ, što try azierbajdžanskija kampanii zarehistravalisia ŭ jakaści ŭdzielnikaŭ VII Biełaruskaha inviestycyjnaha forumu, jaki projdzie 15–16 listapada ŭ Minsku.
Analityki nie vyklučajuć, što vizit Siamaški ŭ Azierbajdžan źviazany ź niaŭdałymi biełaruska-rasijskimi pieramovami ab umovach pastaŭki nafty ŭ čaćviortym kvartale hetaha hoda i ŭ 2013 hodzie.

Čarhovy raŭnd pieramoŭ adbyŭsia ŭ kancy minułaha tydnia ŭ Maskvie, dzie Siamaška sustrakaŭsia z vice-premjeram RF Arkadziem Dvarkovičam. 26 kastryčnika Dvarkovič paviedamiŭ, što Rasija i Biełaruś abmiarkoŭvajuć abjomy pastavak nafty ŭ źviazcy z vyrašeńniem prablemy ekspartu biełaruskim bokam rastvaralnikaŭ. Paźniej stała viadoma, što Maskva prapanuje Minsku kampiensavać rasijskamu biudžetu straty ad «rastvaralnaha» biźniesu, jakija aceńvajucca prykładna ŭ 1,5 młrd. dołaraŭ.

Biełaruski bok pra chod pieramoŭ nie paviedamlaje.
Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?