Žychar Homiela Alaksandr Śnitko nakiravaŭ pa elektronnaj pošcie adozvu prezidentu ZŠA Baraku Abamie i ŭ pasolstva ZŠA ŭ Biełarusi z prośbaj pamiłavać hieroja savieckaj presy pačatku 1980-ch indziejca Leanarda Piełtyjera, jaki adbyvaje dva pažyćciovyja terminy.

U adoźvie da Abamy hamialčanin nahadvaje, što chutka zakančvajecca jaho prezidencki termin i isnuje tradycyja, zhodna ź jakoj prezident u kancy hetaha terminu padpisvaje dakumient ab pamiłavańni adnoj asoby, asudžanaj na pažyćciovaje źniavoleńnie.

Zajaŭnik źviartaje ŭvahu, što ŭ pačatku 2013 hoda spoŭnicca 40 hadoŭ uzbrojenaha vystupleńnia «naščadkaŭ tych, kaho za 100 hadoŭ da hetaha pachavali ŭ braterskaj mahile ŭ miascovaści pad nazvaj Vunded-ni, jakija adčajalisia dabicca spraviadlivaści, stracili nadzieju być pačutymi».
«I vielmi simvalična, što akopy hetaj kupkaj rospačnych, jakija aśmielilisia na bieznadziejnaje paŭstańnie, byli vykapany pobač z braterskaj mahiłaj svaich prodkaŭ, achviar toj kryvavaj raźni ŭ Vunded-ni ŭ kanca XIX stahodździa. Dziaržava — ZŠA — nie mahła ściarpieć takoj nachabnaści ad hetych „brudnych čyrvanaskurych“ i paśla zakančeńnia incydentu abrušyła ŭsiu moc svajho represiŭna-karalnaha aparatu na kiraŭnikoŭ paŭstańnia i aktyvistaŭ indziejskaha ruchu. Adnoj z achviar toj raspravy staŭ Leanard Piełtyjer», — piša Śnitko.

Jon ličyć: Piełtyjer nie złačynca, a achviara dziaržavy ZŠA, jakaja adpomściła ŭ jaho asobie ŭsim indziejcam, što aśmielilisia padać hołas pratestu.

Pravaabarončyja arhanizacyi, dziejačy kultury, palityki i hramadskija dziejačy sumniavajucca ŭ abhruntavanaści i spraviadlivaści pryhavoru Piełtyjeru.

«I voś ciapier šans zrabić učynak i zasłužyć padziaku tysiač i tysiač ludziej na roznych kantynientach, usich tych, chto spačuvaje dramatyčnamu losu indziejcaŭ, u vas u rukach. Vykarystajcie hety šans, spadar prezident! Akramia ŭsiaho inšaha hety ŭčynak uźnimie imidž vašaj krainy ŭ śviecie, jaki vielmi apuściŭsia apošnimi hadami», — zaklikaje Abamu aŭtar pasłańnia.

Jon ličyć, što hetym pamiłavańniem prezident ZŠA zrobić peŭny ŭniosak u spravu zbavieńnia histaryčnaj i humanitarnaj viny, jakuju niasuć Złučanyja Štaty pierad naščadkami tych, kaho jany pryhniatali, vyhaniali, represavali, źniščali na zary svajoj historyi.

Śnitko, pavodle jaho słoŭ, jašče ŭ pačatku 1980-ch udzielničaŭ u akcyi salidarnaści ź Piełtyjeram, jakuju pravodzili ŭ SSSR.

«Zaraz ja vyrašyŭ nahadać amierykanskamu prezidentu i ŭsioj hramadskaści pra viaźnia Piełtyjera. Nakiravaŭ adozvu da VIP-pierson z prośbaj vykazać salidarnaść ź Piełtyjeram. Źviazvajusia i sa svaimi starymi tavaryšami, zaklikaju ich i ŭsich nieabyjakavych ludziej uziać ź mianie prykład», — paviedamiŭ jon.

***

Ličycca, što Leanard Piełtyjer byŭ asudžany ŭ 1975 h. za zabojstva dvuch supracoŭnikaŭ FBR.
Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?