Днём 23 чэрвеня ў рагачоўскія РАУС і РАНС паступіла інфармацыя аб тым, што з садаводчага таварыства «Пчолка» пайшоў 73-гадовы пенсіянер і не вярнуўся. Як мяркуецца, мужчына накіраваўся ў лес раніцай 22 чэрвеня.
Як паведамілі ў Гомельскім абласным упраўленні МНС, да пошукаў зніклага былі прыцягнутыя пяць міліцыянераў, тры ратавальнікі, прадстаўнікі лясгасу і мясцовае насельніцтва.
Каля дзвюх гадзін дня 23 чэрвеня пенсіянера ў лесе ля вёскі Блізняцы знайшоў камандзір аддзялення пажарнага аварыйна-ратавальнага паста МНС вёскі Зарэчча. Прапаршчык унутранай службы на адпачынку збіраў грыбы.
Сустрэўшы мужчыну, які блукаў больш за суткі па лесе, ратавальнік праінфармаваў пра здарэнне калег.
Стан пенсіянера здавальняючы, у шпіталізацыі ён не мае патрэбы.
