Прэзідэнт Польшчы Браніслаў Камароўскі прыме адстаўку ўрада Дональда Туска ў бліжэйшы чацвер — 11 верасня. Пра гэта паведаміла кіраўнік прэс-службы кіраўніка дзяржавы Іаана Тшаска-Вячорэк.
«Дональд Туск падасць у адстаўку пасля пасяджэння Рады нацыянальнай бяспекі, якое запланавана на аўторак. Прэзідэнт прыме адстаўку прэм'ера і кабінета міністраў у чацвер у другой палове дня», - сказала яна.
Эва Копач, фота gazetaprawna.pl
Па словах прадстаўніцы прэзідэнта, кандыдат на пасаду кіраўніка кабінета міністраў — спікер сейма Эва Копач, якая была міністрам здароўя ў 2007—2011 гг.
З ёй Камароўскі мае намер сустрэцца пасля сыходу дзеючага ўрада ў адстаўку. Паводле польскай канстытуцыі, у кіраўніка дзяржавы будзе два тыдні, каб прапанаваць парламенту новага прэм'ера.
Дональд Туск вымушаны пакінуць пасаду кіраўніка ўрада ў сувязі з яго прызначэннем на пасаду старшыні Еўрапейскай рады.
