Аб гэтым на брыфінгу 4 снежня ў Мінску паведаміў ізраільскі пасол Іосіф Шагал.
Нагадаем, міжурадавае пагадненне пра адмену віз паміж Беларуссю і Ізраілем было падпісанае 19 верасня гэтага года.
Паводле слоў Шагала, «адмена візавага рэжыму не прадугледжвае адмены віз для ўладальнікаў службовых і дыпламатычных пашпартоў, толькі для ўладальнікаў нацыянальных пашпартоў».
Дыпламат звярнуў увагу на тое, што на сённяшні дзень візавы рэжым паміж дзвюма краінамі дзейнічае. У ізраільскага пасольства, сказаў ён, ёсць падставы меркаваць, што вялікая колькасць беларусаў няправільна зразумелі паведамленне аб бязвізавым рэжыме:
«Народ дакладна адлічыў 90 дзён ад 19 верасня, і мы баімся, што 20 снежня людзі ламануцца на мяжу без візаў… Людзі ўжо заказваюць білеты, гасцініцы — зіма, Новы год… Ёсць інфармацыя, што дзясяткі тры беларусаў набылі пуцёўкі, але да нас [у пасольства] не прыйшлі», — растлумачыў Шагал.
Ён адзначыў, што паводле ўмоў пагаднення бязвізавы рэжым паміж Беларуссю і Ізраілем установіцца праз 90 дзён пасля таго, як гэты дакумент ратыфікуюць парламенты дзвюх краін, і не раней. «Кнэсэт самараспускаецца ў панядзелак. У нядзелю [7 снежня] адбудзецца пасяджэнне камісіі Кнэсэта па ўнутраных справах, яны падрыхтуюць гэтае пытанне… Я спадзяюся, што ў гэтым месяцы ўсе працэдуры завершацца, і ў сакавіку ў нас пачне працаваць бязвізавы рэжым», — сказаў дыпламат.
Што ж датычыцца беларусаў, якія ўжо запланавалі найбліжэйшым часам паездку ў Ізраіль, набылі пуцёўкі, білеты ці забраніравалі гатэлі, то ізраільскае пасольства гатовае дапамагчы ім атрымаць пакуль яшчэ неабходныя візы, аказваючы паслугі практычна «ў рэжыме нон-стоп».
Іосіф Шагал таксама адзначыў, што атрымаць ізраільскую візу цяпер не настолькі цяжка — яе кошт для беларусаў складае 26 даляраў. У той жа час ізраільцяніну беларуская віза сёння абыходзіцца ў 120 еўра.
