Фота: imgarcade.com
Экстазі, кетамін і метамфетамін і сотня іншых наркотыкаў сталі на дзень легальнымі ў Ірландыі, распавядае Business Insider са спасылкай на ірландскія СМІ.
У аўторак, 10 сакавіка Акт пра злоўжыванне наркотыкамі 1977 года быў прызнаны апеляцыйным судом неканстытуцыйным падчас работы над зменай класіфікацыі псіхаактыўных рэчываў. Праз гэта з 11 сакавіка фармальна стаў легальным шэраг наркатычных рэчываў.
Урад Ірландыі заўважыў «дзіру» ў законах і тэрмінова ўзяўся за папраўкі. Але прынятыя папраўкі ўступяць у сілу не раней за 12:00 12 сакавіка.
«Дзіра» ў законе на закранае гераін, какаін ці канабіс — толькі больш новыя наркотыкі. Урад падкрэслівае, што пастаўкі і продаж наркотыкаў «застаюцца злачынствам паводле існуючых законаў».
* * *
Адваротная праблема да нядаўняга часу існавала ў Беларусі. У спіс наркатычных сродкаў рэгулярна траплялі новыя рэчывы, але ўкладальнікі спісу не паспявалі за вытворцамі шкодных рэчываў. Новыя сінтэтычныя наркотыкі хутка вынаходзіліся і пэўны час з’яўляліся фармальна легальнымі.
«Дзіру» ў законах выправіў «антынаркатычны дэкрэт», у якім быў уведзены панятак «базавая структура наркатычных сродкаў, псіхатропных рэчываў і іх прэкурсораў», што фактычна забараніла ўсе магчымыя «спайсы».