Ранкам 8 жніўня ў вёсцы Браніслаў Жыткавіцкага раёну затрымалі назіральніка Яўгена Шчура, паведамляе «Свабода».
Тры дні таму ён правёў ноч у ізалятары часовага ўтрыманьня і пазьней быў асуджаны за «дробнае хуліганства», бо «наўмысна, з хуліганскіх памкненьняў, ня маючы прычын наведваньня школы, ігнараваў патрабаваньні дырэктара школы пакінуць рэжымны аб’ект».
«Мне патэлефанаваў Яўген Шчур раніцай, каля 9:30. Сказаў, што ў хату ягонай маці ў вёсцы Браніслаў, дзе ён цяпер знаходзіўся, грукаюць міліцыянты. Празь дзьверы яны паведамілі, што недзе ў вёсцы на асфальце зьявіўся надпіс «Стоп, таракан!» і Яўген можа быць датычны да гэтага. Мне Яўген сказаў, што ён не рабіў ніякіх надпісаў. У хуткім часе сувязь зь ім зьнікла», — паведаміў «Свабодзе» праваабаронца Леанід Судаленка.
Ён мяркуе, што такім чынам мясцовыя ўлады і міліцыя хочуць не дапусьціць Яўгена да назіраньня ў асноўны дзень галасаваньня 9 жніўня.
За «беспрычыннае наведваньне» будынка школы Яўген Шчур атрымаў на судзе штраф у памеры 3 базавых велічынь.
