Аркадзь Добкін напісаў учора ліст-зварот да супрацоўнікаў EPAM з нагоды падзеяў, якія адбываюцца ў Беларусі. Dev.by прыводзіць тэкст у перакладзе з англійскай.
— На працягу апошніх некалькіх дзён усе вы бачылі ці чулі пра пратэсты, якія адбываюцца ў Беларусі пасля прэзідэнцкіх выбараў, альбо мелі зносіны з людзьмі, якіх закранулі гэтыя падзеі. Для некаторых з вас абвастрэнне сітуацыі сёння і на мінулых выходных стала кульмінацыяй ланцужка працэсаў, якія папярэднічалі выбарам. Іншыя не чакалі, што хваляванні дасягнуць такіх маштабаў і так глыбока закрануць вашыя сем'і, сяброў і калегаў.
Уся кіроўная каманда EPAM пільна сочыць за развіццём сітуацыі і імгненна рэагуе на яе. У гэтым годзе мы пераадольвалі шматлікія выклікі, звязаныя з рознымі неардынарнымі абставінамі, уключаючы пандэмію каранавіруса, пратэсты ў ЗША і праблемы ў іншых краінах свету.
Сёння мы сутыкнуліся з беспрэцэдэнтнай падзеяй для Беларусі, дзе ЕРАМ пачынаўся і дзе знаходзіцца сёння найбуйнейшы цэнтр распрацоўкі кампаніі.
У сілу нашага папярэдняга вопыту і спецыяльнага плана работы ў непрадбачаных сітуацыях, распрацаванага ў кампаніі для забеспячэння бесперапыннай працы ў выпадку форс-мажорных абставінаў, бягучае становішча спраў пакуль яшчэ не адбіваецца значным чынам на кліентах. У той жа час мы ўжо атрымалі шэраг запытаў і чакаем, што іх паток будзе расці.
У залежнасці ад далейшага развіцця падзей мы будзем прымаць рашэнні аб неабходнасці наступных крокаў.
На сёння мы аднавілі працу шматлікіх офісаў, каб забяспечыць супрацоўнікаў сувяззю ў працоўных і асабістых мэтах. Нашы офісы будуць функцыянаваць у якасці пляцовак для правядзення сустрэч і працы, аднак мы заклікаем вас умерана карыстацца сацсеткамі і стрымінгавымі сэрвісамі, каб знізіць нагрузку на сеткі.
Мы просім тых з вас, хто выйшаў на вуліцы, перш за ўсё думаць пра сваю бяспеку. Мы хочам і будзем дапамагаць тым, чые родныя былі несправядліва затрыманыя або пацярпелі якім-небудзь іншым чынам.
Сфармаваныя некалькі груп падтрымкі ў крызісных сітуацыях з ліку калегаў, якія гатовыя адгукнуцца і зрабіць усё магчымае, каб дапамагчы вам у цяперашніх абставінах.
З гэтай мэтай EPAM арганізавала гарачую лінію, на якую ў экстранным выпадку могуць звярнуцца вашы блізкія.
Мы просім вас перадаць гэтым людзям нумар нашай гарачай лініі і сказаць ім, што пры неабходнасці яны могуць патэлефанаваць на яе.
Пакуль у нас няма адказаў на некаторыя з вашых найбольш вострых пытанняў пра тое, што будзе адбывацца ў далейшым.
Але мы зробім усё, што ў нашых сілах, каб дапамагчы! Бяспеку і здароўе вас і вашых родных, роўна як і ваша будучыня, — наш прыярытэт.
Сёння Беларусь уяўляе сабой не проста найбуйнейшы цэнтр EPAM. Беларусь — частка ДНК кампаніі і найважнейшы кампанент яе стратэгіі росту.
Беражыце сябе, турбуйцеся пра сябе і адзін пра аднаго. Мы з вамі і мы зробім усё магчымае, каб справіцца з гэтым.
