У законе «Аб барацьбе з тэрарызмам» ёсць паняцце рэжыму ў зоне правядзення контртэрарыстычнай аперацыі.
Згодна з ім, сілавікі могуць часова абмяжоўваць або забараняць рух транспарту і пешаходаў на вуліцах і дарогах, не прапускаць транспарт, у тым ліку дыпламатычны.
Супрацоўнікам органаў дазволена затрымліваць грамадзян пры адсутнасці ў іх дакументаў, якія пацвярджаюць іх асобу, для ўстанаўлення асобы. А таксама ўваходзіць бесперашкодна ў чужое жыллё і аглядаць яго — пры неабходнасці з пашкоджаннем замкоў і дзвярэй, у любы час сутак. Фармальная падстава — падазрэнне чалавека ў здзяйсненні акту тэрарызму, стварэнні незаконнага ўзброенага фармавання або ўдзеле ў ім. Выключэнне — дыпламатычныя прадстаўніцтвы, консульскія ўстановы, памяшканні, дзе жывуць супрацоўнікі прадстаўніцтваў і іх сем'і.
Могуць даглядаць людзей, іх рэчы і транспарт — у тым ліку і з прымяненнем тэхнічных сродкаў. А таксама выкарыстоўваць транспарт і тэлефоны, якія належаць грамадзянам, дзяржаўным органам і іншым арганізацыям — «у службовых мэтах».
СМІ падпадаюць пры такім рэжыме пад строгую цэнзуру — працу журналістаў рэгулюе кіраўнік контртэрарыстычнай аперацыі.
Але трэба адзначыць, што пасля выбараў 2020 года сілавікі пры жаданні і так прыбягалі да вышэй апісаных мер у парушэнне закона. Аднак абвяшчэнне асаблівага рэжыму можа быць сігналам да яшчэ большага ўзмацнення рэпрэсій, якія вядуцца і без таго.
У законе сказана, што для ўдзелу ў контртэрарыстычнай аперацыі могуць прыцягвацца розныя сілавыя органы, а таксама Узброеныя сілы.