Палац Горватаў з вышыні птушынага палёту
На пачатку допісу Кузняцоў нагадвае, што не так даўно адзін з яго кампаньёнаў, вядомы пісьменнік Андрэй Горват
«напісаў у ФБ пост, з якога ўсе цалкам абгрунтавана зразумелі, што аўтар пакінуў краіну. І пасля зрабілі не менш абгрунтаваную выснову, што палацам у Нароўлі ён больш займацца не будзе».
Аднак жа, нагадвае журналіст, Горват у гэтай справе быў не адзін:
«Нараўлянскі палац роду Горватаў XIX стагоддзя восенню 2020 года быў выкуплены на аўкцыёне з мэтай рэстаўрацыі кампаньёнамі ў складзе: Андрэй Горват, Пётр Кузняцоў і Аляксандр Баранаў».
І кампаньёны з таго часу не сядзелі склаўшы рукі:
«З таго моманту палац быў цалкам расчышчаны, створаны праект кансервацыі, згодна з ім, закладзеныя асновы даху, створаны і амаль узгоднены праект рэканструкцыі».
Паводле Кузняцова, Андрэй Горват у працэсе рэстаўрацыі палаца быў несумненна важнай фігурай: бо
«адыгрываў вядучую публічную ролю і вядучую арганізацыйную: ён пасяліўся ў Нароўлі, непасрэдна арганізоўваў усе працы на месцы, каардынаваў усе намаганні валанцёраў, размаўляў са СМІ і мясцовай уладай».
Таму, калі Горват выехаў з Беларусі і паведаміў пра гэта даволі невыразна, «вакол тэмы нарадзілася мноства здагадак, чутак і плётак», якія Кузняцоў сваім пастом паставіў мэту развеяць. Ён вылучыў тры асноўныя «міфы», якія склаліся вакол сітуацыі:
«Міф 1. Праекту «канец», таму што Андрэй Горват з'ехаў з прычыны пераследу праз гэты сам праект. Як правіла, тыя, хто гаворыць такое, ніяк не тлумачаць логіку падобнага зняволення, але чуць, што нас усіх «прэсуюць з-за палаца», даводзіцца часта».
У адказ на гэта Кузняцоў сцвярджае, што гэта няпраўда. З палацам ад'езд Горвата ніяк не звязаны, там іншая гісторыя.
«Міф 2. Тое, што праекту «канец», стала зразумела, пасля таго, як у СМІ з'явілася інфармацыя, што была закрытая арганізацыя — юрыдычная асоба, на якую быў набыты палац».
Гэта таксама, паводле Кузняцова, няпраўда. Закрытая была арганізацыя, якая працавала ў Мазыры і да палаца непасрэднага дачынення не мела, толькі ўскоснае. А пацярпела па іншых прычынах.
«Міф 3. Усяму «канец», таму што Горват з'ехаў».
Кузняцоў сцвярджае, што «на гэты момант усе працы, якія вяліся па распрацоўцы і ўзгадненні праектнай дакументацыі, працягваюцца мной — нічога не спынілася».
Ён не адмаўляе таго, што дадатковая нагрузка, якая на яго звалілася, «нечаканы, непрыемны і вельмі непатрэбны снег на галаву — вясной», бо хапае аж з лішкам уласных праблем самага рознага кшталту. Але ўсё ж такі ён, нягледзячы ні на што, у гэта ўпрогся і цягне.
«Калі мяне спытаць, навошта мне гэта наогул трэба, рацыянальна я, напэўна, сказаў бы, што не ведаю. Магчыма, характар у мяне такі, дурны — пакуль фізічна магчыма, не кідаю ні спраў, ні людзей.
Таму пакуль — нічому не канец. Палац ніхто не рэпрэсаваў і тут пакуль яшчэ ёсць, каму ім займацца. А вось што атрымаецца — мы ўжо адносна хутка будзем бачыць. І залежаць усё гэта будзе ад нас з вамі», — завяршае свой допіс Пятро Кузняцоў.
Чытайце таксама:
Палац у Нароўлі плануюць рэканструяваць: патрэбная дапамога
Аўтар бестселера «Радзіва Прудок» запрашае на расчыстку палаца ў Нароўлі
