Паліцэйскія праходзяць міма спаленых аўтамабіляў падчас сутыкненняў з моладдзю ў Нантэры, 29 чэрвеня 2023 г. Фота: Christophe Ena / AP Photo
17-гадовы хлопец Наэль М., паводле папярэдніх звестак, алжырац па паходжанні, у аўторак быў спынены паліцэйскім патрулём за рулём аўтамабіля праз парушэнне правілаў і застрэлены.
Паліцыянты спачатку заявілі, што Наэль спрабаваў збіць іх, але на апублікаваным пазней і верыфікаваным агенцтвам AFP відэа здарэнне выглядае інакш.
Фота: Christophe Ena / AP Photo
Пасля гэтага ў ноч на сераду ў прыгарадах Парыжа ўспыхнулі беспарадкі.
Абураныя дзеяннямі паліцыі пратэстоўцы будавалі барыкады, стралялі па паліцэйскіх феерверкамі і спалілі некалькі дзясяткаў аўтамабіляў. Паліцыя адказвала слезацечным газам.
Фота: Christophe Ena / AP Photo
На відэа, апублікаваных у сацыяльных сетках, відаць, як у сераду па ўсім Парыжы падпальвалі аўтамабілі і рабавалі крамы.
У ноч на чацвер беспарадкі працягнуліся. Па паведамленні AFP, уначы каля 20 маладых людзей, узброеных феерверкамі, напалі на турму ў Фрэсне.
Фота: Christophe Ena / AP Photo
У Нантэры, парыжскім прыгарадзе, дзе нарадзіўся Наэль, паліцыя была вымушаная адступіць пад напорам пратэстоўцаў, як паведамляе Le Monde.
Уначы пратэстоўцы па ўсім Парыжы нападалі на паліцэйскія ўчасткі, закідваючы іх феерверкамі.
Фота: Christophe Ena / AP Photo
Асабліва вострай была сітуацыя вакол раёна Пабла Пікасо, дзе маладыя людзі выйшлі на вуліцы пасля захаду сонца і ўступілі ў сутыкненні з паліцыяй.
Сутыкненні дэманстрантаў з паліцыяй адбыліся таксама ў Лілі. На кадрах, размешчаных у сацсетках, відаць, як людзі ў ратушы прыгарада Монс-ан-Барэуль падпальваюць паперы і крэслы.
У горадзе Рэн каля 300 чалавек сабраліся, каб ушанаваць памяць юнака, некаторыя з іх запалілі вогнішчы, але былі разагнаныя паліцыяй.
