Ілюстрацыйнае фота: «Наша Ніва»
Жыхара Віцебска прыцягнулі да крымінальнай адказнасці за апаганьванне магіл: п'яны мужчына выдраў крыж з магілы самагубцы і аднёс яго за агароджу могілак, як паведамляюць «Народныя навіны Віцебска».
У той дзень мужчына наведваў магілу бабулі на могілках у Лёзненскім раёне. Непадалёк заўважыў магілу чалавека, які, наколькі ён ведаў, учыніў суіцыд.
Паколькі раней па звычаях такіх людзей хавалі па-за межамі могілак на неасвячонай зямлі, мужчына вырашыў нагадаць родным самазабойцы пра няправільна выбранае месца пахавання.
Ён вырваў крыж з зямлі і аднёс яго да ўскраіны могілак, а потым пайшоў дадому.
Гэта заўважыла аднавяскоўка мужчыны, чыя магіла была апаганеная, і паведаміла пра здарэнне сваякам. Прыехаўшы на могілкі, тыя знайшлі крыж ля агароджы, акрамя таго, была пашкоджаная рамка партрэта на магіле. Выклікалі міліцыю, і мужчыну затрымалі.
У адносінах да яго распачалі крымінальную справу паводле часткі 1 артыкула 347 КК. Суд Лёзненскага раёна прызнаў мужчыну вінаватым у здзеку з магілы і прысудзіў штраф 1850 рублёў.
