Ганна Краснер. Фота: сацсеткі
Ганна Краснер нарадзілася недалёка ад Пінска, у вёсцы Пінкавічы. Пасля заканчэння школы дзяўчына паступіла ў тэхналагічны ўніверсітэт, дзе сустрэла свайго будучага мужа. Пара пазнаёмілася ў інтэрнаце. «Яны ўдзельнічалі ў гульнях, хадзілі ў паходы, трэніраваліся ў фехтаванні і вельмі шмат часу бавілі сярод сяброў. З таго моманту прайшло больш за 22 гады», — падзяліўся з «Нашай Нівай» знаёмы сям’і.
У шлюбе, які доўжыўся больш за 19 гадоў, нарадзіліся дачка Марыя і сын Аляксандр.
Фота: Facebook Ганны Краснер
Адпрацаваўшы размеркаванне на магілёўскай фабрыцы «Вяснянка», Краснер пераехала ў Віцебск. Менавіта ў гэтым горадзе пачаўся яе шлях у свеце вясельнай моды. Спачатку яна працавала канструктарам, а пазней вырашылася на стварэнне ўласнай калекцыі.
Нягледзячы на высокую канкурэнцыю, справа пайшла ўгару: сукенкі, створаныя рукамі Ганны, карысталіся вялікім попытам. Так з'явіўся брэнд, добра знаёмы беларускім нявестам — «Майстэрня Ганны Краснер».
Дызайнерка была ўдзельніцай Беларускага тыдня моды. Нароўні з працамі Вячаслава Зайцава і Валянціна Юдашкіна, яе сукенкі ўпрыгожвалі каляндар «Рускі сілуэт». Дзяўчына ўдзельнічала ў міжнародных конкурсах.
За сваю кар'еру Ганна Краснер апранула больш за 1300 нявест. Сярод яе кліентаў былі дзяўчаты з Беларусі, Іспаніі, Швейцарыі, Ізраіля, Аўстрыі і многіх іншых краін.
Фота: Facebook Ганны Краснер
Але ў ліпені 2021 года стала вядома аб закрыцці праекта. У тым жа годзе сям'я пераехала ў Варшаву:
«Калі б мяне два гады таму спыталі, дзе я буду праз два гады і што я буду там рабіць, я магла б выказаць у здагадку шмат чаго… Знаходжанне ў любым пункце Еўропы, напрыклад. У якасці турыста, але не як жыхаркі Варшавы. Іншыя былі планы, іншыя. Цяпер жа дапускаю любыя падзеі, нават самыя неверагодныя», — пісала Ганна ў сацыяльных сетках.
У эміграцыі жанчына атрымала новую прафесію QA-інжынера і нават паспела папрацаваць у IT, але праз час вярнулася да дызайну.
«У мяне так часта пыталіся, чаму я больш не шыю сукенак, што пасля чарговага «чаму» я вырашыла, што так, я хачу паспрабаваць. Цяпер я шыю сукенкі. Пакуль не шмат, пакуль у якасці хобі (вельмі прафесійнага хобі) пару заказаў на месяц», — распавядала Ганна ў сваім Facebook.
22 кастрычніка адбыўся першы вялікі паказ Краснер у Варшаве: «Дзякуй вялікі ўсім датычным! А далей будзе яшчэ лепш і цікавей», — дзялілася яна радасцю з падпісчыкамі. На жаль, планам не наканавана было спраўдзіцца.
Фота: Facebook Ганны Краснер
«У нас гора, памерла Ганна. У яе спынілася сэрца, была хуткая, рэанімацыя ў бальніцы», — паведаміў у сацсетках муж дызайнеркі.
Вядома, што ў Ганны не было зафіксаваных праблем са здароўем і яна рэдка звярталася да дактароў. Часам у жанчыны быў высокі ціск, але гэта вырашалася без звароту ў лякарню.
Што прывяло да трагедыі, пакуль не зразумела — сям'я яшчэ чакае заключэнне экспертаў. Пахаванне Ганны пройдзе ў Варшаве на праваслаўных могілках у раёне Воля. Інфармацыя аб часе развітання будзе апублікавана пазней.
