Сёлета ў рамках святкавання афіцыйнага Дня Незалежнасці ўпершыню будуць урачыста пахаваны астанкі невядомых салдат Вялікай Айчыннай вайны.
Цырымонія адбудзецца 2 ліпеня ў Храме‑помніку ў гонар Усіх Святых у Мінску на вуліцы Каліноўскага. Як паведаміў на прэс‑канферэнцыі 18 чэрвеня начальнік упраўлення мастацтваў Міністэрства культуры Міхаіл Казловіч, у цырымоніі плануецца ўдзел прэзідэнта Аляксандра Лукашэнкі і мітрапаліта Філарэта. Пасля заканчэння мерапрыемства побач з храмам выступіць Дзяржаўны сімфанічны аркестр Беларусі.
1 ліпеня ў Палацы Рэспублікі адбудзецца канцэрт майстроў мастацтваў, у якім возьмуць удзел вядучыя беларускія калектывы і выканаўцы. Пасля канцэрта будзе наладжаны прыём з нагоды Дня Незалежнасці ад імя прэзідэнта, паведаміў Казловіч.
Цэнтральнай святочнай падзеяй 3 ліпеня стане традыцыйны канцэрт майстроў мастацтваў каля стэлы «Мінск — горад‑герой» на праспекце Пераможцаў. Ён пачнецца ў 21.00 і працягнецца да дзвюх гадзін ночы.
У канцэрце возьмуць удзел майстры эстраднага і класічнага мастацтваў, запрошаны расійскі гурт «Чэлсі».
З 22.55 да 23.00 пройдзе акцыя «Праспяваем гімн разам». «Акцыя сінхронна пройдзе па ўсёй рэспубліцы, ва ўсіх абласцях», — сказаў прадстаўнік Мінкульта. Пасля выканання гімна будзе дадзены ўрачысты салют у Мінску і абласных цэнтрах.
Святочныя мерапрыемствы з нагоды Дня Незалежнасці — канцэрты, шэсці, спартыўныя спаборніцтвы, ушаноўванні ветэранаў — будуць арганізаваны ва ўсіх абласцях краіны, адзначыў начальнік упраўлення мастацтваў.
