Расійская тэнісістка Марыя Шарапава, якая з’яўляецца паслом добрай волі Праграмы развіцця ААН (ПРААН), пасля выступлення на Уімблдонскім турніры адправіцца ў Беларусь, каб наведаць тэрыторыі, што пацярпелі ад катастрофы на ЧАЭС.
Шарапава плануе прыехаць у Гомельскую вобласць, дзе яе дабрачынны фонд дапамог прафінансаваць шэраг праектаў ПРААН, арыентаваных на моладзь, зазначаецца ў прэс‑рэлізе арганізацыі.
У Чачэрску Шарапава наведае Цэнтр дзіцячай творчасці, выхаванцы якога вывучаюць экалогію і бяруць удзел у праектах па акультурванні горада. «Пасля гэтага яна зробіць прыпынак у медыцынскай установе, у якой выкарыстоўваецца тэрапеўтычны падыход да барацьбы са стрэсам», — гаворыцца ў паведамленні. Затым тэнісістка правядзе сустрэчу са студэнтамі вядучых універсітэтаў краіны, якія атрымліваюць стыпендыі са сродкаў яе фонду.
«Я заўсёды марыла зрабіць свой унёсак у працэс аднаўлення рэгіёну, з якім у мяне асабістая сувязь,
— сказала Шарапава. — Дапамагчы людзям навучыцца дапамагаць самім сабе — гэта сутнасць місіі ПРААН, і я з нецярплівасцю чакаю магчымасці на свае вочы ўбачыць вынікі».
***
Шарапава нарадзілася ў 1987 годзе ў сібірскім горадзе Нягань, куды яе бацькі пераехалі з Гомеля пасля чарнобыльскай катастрофы. Пражыўшы два гады ў Нягані, сям’я пераехала ў Сочы. У 1995 годзе Марыя Шарапава пакінула Расію, каб займацца тэнісам у ЗША. У 2004 годзе яна выйграла свой першы турнір Вялікага шлема ва Уімблдоне і была прызнана гульцом года паводле версіі Жаночай тэніснай асацыяцыі. У 2006 годзе стала пераможцай адкрытага чэмпіянату ЗША, а ў 2008‑м выйграла адкрыты чэмпіянат Аўстраліі.
У партнёрстве з ПРААН Фонд Марыі Шарапавай аказаў падтрымку сямі праектам,
арыентаваным на моладзь і рэалізаваным у пацярпелых рэгіёнах Беларусі, Расіі і Украіны, а таксама фінансуе ў Беларусі праграму стыпендый для студэнтаў — выхадцаў з забруджаных радыенуклідамі раёнаў.
Тэнісістка стала паслом добрай волі ПРААН у 2007 годзе. Яе роля заключаецца ў «садзейнічанні дасягненню Мэтаў развіцця тысячагоддзя з акцэнтам на актывізацыю аднаўлення тэрыторый, што пацярпелі ад чарнобыльскай аварыі».
