Рок-музыка выступіць з імі на фолк-фэсце «Камяніца».
«Камяніца» адбудзецца 4 верасня ў Музеі народнай архітэктуры і побыту.
Акрамя хэдлайнераў, «Тройцы» і «Палаца», у Строчыцах выступяць гурты «Маланка Аркестр», Akana, «Бан-Жвірба» і GUDA. Акрамя гэтага плануюцца выступы маладых калектываў, а таксама народныя гульні і забавы.
«Мы жадаем паказаць розныя бакі сучаснай беларускай фолк-культуры, таму на фэсце будуць не толькі архаічныя спевы і туга, але і сучасныя эксперыменты і шмат пазітыву, — распавядае каардынатар фэсту Сяргей Чагрынец. — Таксама наведвальнікі будуць мець магчымасць агледзіць усю экспазіцыю музею і проста добра пашпацыраваць сярод лугоў і аўтэнтычных драўляных забудоў 18-20 стагоддзяў».
У гэтым годзе фэст таксама распачынае традыцыю запрашэння адмысловых гасцей. Вядомыя выканаўцы з іншых музычных напрамкаў будуць у межах фэсту спяваць народныя песні. Першым з іх будзе рок-музыка Лявон Вольскі.
«Запрашэнне было досыць нечаканым, але тым больш цікавым, — прызнаецца Вольскі. — Будзем прэзентаваць невялікую адмысловую праграму з акустычнымі інструментамі. Спадзяюся, што фолк-дзеячы не раскрытыкуюць наш эксперымент».
Дарэчы, даехаць сёлета да фэсту будзе значна прасцей. Ад прыпынку «Малінаўка-6» (скрыжаванне вуліц Громава і Слабадской) да музею і ад яго з 13 да 22 гадзін будзе ездзіць бясплатнае маршрутнае таксі. Акрамя таго можна будзе даехаць аўтобусам №203 ад аўтастанцыі «Паўднёва-Заходняя», які ў гэты дзень будзе хадзіць часцей і пазней, чым звычайна.
Квіткі: 6300 руб. для дарослых, 3150 руб. для школьнікаў. Усе сродкі ад продажу пойдуць на рахункі музею.
