Расійскія нафтавыя кампаніі спынілі пастаўкі нафты ў Беларусь, паколькі з 1 студзеня адсутнічаюць адпаведныя дамовы, пішуць «Ведамасці», спасылаючыся на інфармацыю ад «Белнафтахіма».
Пра складанасці з заключэннем дамоў стала вядома ў канцы 2010 гады, але яшчэ 6 студзеня «Беннафтахім» разлічваў, што дамовы будуць падпісаны пасля святаў. Перамовы зацягнуліся, абмяркоўваецца цана, піша газета. Калі могуць быць падпісаны дакументы, пакуль незразумела, адзначаецца толькі, што
транзіт расійскай нафты ў Еўропу ідзе ў штатным рэжыме, а запасаў на беларускіх НПЗ хопіць да канца студзеня.
Пытанне вырашаецца на самым высокім узроўні, заявіў расійскай газеце супрацоўнік «Роснефті», аднак ва ўрадзе Расіі гэтага не пацвярджаюць.
«Пастаўкі нафты ў Беларусь ажыццяўляе не дзяржава, а камерцыйныя арганізацыі; урад Расіі, натуральна, не можа ўплываць на камерцыйныя перамовы», – падкрэслівае прэс-служба расійскага прэм'ера.