Усход Беларусі атакавала навальніца. Паплыў Магілёў
Вуліцы ў горадзе ператварыліся ў рэкі, затопленымі аказаліся падворкі. Заглохлыя ў лужынах машыны дапамагала выцягваць ДАІ.
27.07.2023 / 21:01
Магілёў. Затопленае перакрыжаванне вуліц Першамайская і Ціміразеўская. Фота: сацыяльныя сеткі
Дажджы заліваюць усходнія рэгіёны Беларусі ўжо некалькі дзён. Сённяшнія сіноптыкі кваліфікавалі як дужа моцныя.
На Магілёў навальніца абрынулася 27 ліпеня пасля абеду.
«Дождж — капец поўны!», — адрэагавала жыхарка абласнога цэнтру на пытанне пра сітуацыю ў горадзе.
Магілёў. Тутэйшы ручай Струшня стаў пасля залевы неўтаймаваным патокам бруднай вады. Фота: сацыяльныя сеткі
Па словах жанчыны невялікія мясцовыя рачулкі ператварыліся ў вусцішныя патокі бруднай вады.
Фота– і відэаздымкамі з наступствамі непагадзі стракацяць чаты аўтамабілістаў.
Кіроўцы адзін аднаму паведамляюць, куды лепш не ехаць. Пад вадою апынуліся праезныя часткі вуліц, як у цэнтры Магілёва, так і ў спальных раёнах.
Звыклай справай стаў патоп на скрыжаванні вуліц Першамайскай і Ціміразеўскай. Гэтая гарадская мясціна непадалёк ад будынка аблвыканкама. Тутэйшая ліўнёўка не спраўляецца з вялікай вадою.
Магілёў пасля залевы. Праезная частка вуліцы Касманаўтаў пад вадою. Скрын відэа з сацыяльных сетак
Дасведчаны кіроўца папярэджвае сваіх калег-пачаткоўцаў быць абачлівымі, выязджаючы з вуліцы Лазарэнкі да будынка драматычнага тэатра (гэта цэнтр горада):
«З разгону ў лужыны заязджаць не трэба, а то ўжо пару чалавек заглухла, бо заліло рухавік дажджавой вадой».
«Перакрыжаванне Сіманава і Астроўскага — басейн…», — засцерагае яшчэ адзін кіроўца калегаў. Гэта гарадская мясціна ў Задняпроўі.
Адна з галоўных магістраляў Задняпроўя — вуліца Габраўская — таксама апынулася пад вадой.
Магілёў. Абстаноўка пасля залевы на вуліцы Габраўскай. Скрын відэа з сацыяльных сетак
«Будзьце на ёй асцярожныя. Шмат вады», — папярэджвае кіроўца калегаў
Аб сітуацыі ў іншым месцы гораду напісаў наступны ўладальнік аўто:
«Кальцо Касманаўтаў вельмі вялікая лужына, аб'язджайце».
Яго калега дадае:
«Дапамагае ДАІ, выцягваюць з лужын…»
Магілёў. Вуліца Сіманава пасля залевы. Скрын відэа з сацыяльных сетак
Жыхарам аднаго з дамоў на вуліцы Грышына давялося дабірацца да пад’езда па калена ў вадзе. Сваім горам яны падзяліся на фота ў сацсетках.
Вуліца Грышына ў Магілёве пасля залевы. Фота: сацыяльныя сеткі
Прагнозы сіноптыкаў на заўтрашні дзень абнадзейваюць: дажджы сунімуцца.
Глядзіце таксама:
У Клімавіцкім раёне жанчыны выклікалі дождж пры дапамозе адмысловага абраду ФОТЫ
Кліматолаг тлумачыць, у чым прычыны свавольства надвор’я і чым пагражае доўгая адсутнасць дажджоў
Падрабязнасці трагедыі на Мінскім моры, дзе ў непагадзь загінула 19-гадовая дзяўчына