Пракуратура Салігорскага раёна разгледзела скаргу мясцовага дэмакратычнага актывіста Уладзіміра Шылы на дзеянні супрацоўнікаў міліцыі падчас правядзення так званага агляду ў яго прыватным доме. У ходзе праверкі падстаў для прыняцця мер пракурорскага рэагавання пракурор раёна Алег Аўдзей не пабачыў.
Падчас праверкі было ўстаноўлена, што агляд дома вядомага на Салігоршчыне апазіцыянера праводзіўся на падставе пастановы, вынесенай аперупаўнаважаным аддзялення па наркакантролі і супрацьдзеянні гандлю людзьмі, і быў санкцыянаваны пракурорам. Адмову міліцыянтаў даць Уладзіміру Шылу копію пратакола агляду са спісам вынятай у яго камп'ютарнай тэхнікі пракурор патлумачыў адсутнасцю адпаведнай нормы ў Крымінальна-працэсуальным кодэксе.
Сам актывіст называе такую сітуацыю абсурднай. Агляд быў праведзены, тэхніка міліцыянтамі забраная, а дакументальнага пацверджання гэтаму ў актывіста няма. У такіх абставінах, як і ў выпадку з аглядам і выманнем маёмасці ў салігорскага моладзевага актывіста Уладзіміра Лемеша, спадар Шыла не можа быць упэўненым у надзейным захаванні сваіх асабістых рэчаў. Нельга быць упэўненым і ў тым, што ў пратаколе не з’явяцца якія-небудзь дакументы ці прадметы, якіх у яго насамрэч не вымалі.
