Канцлер Аўстрыі Крысціян Керн хоча даць мясцовым працадаўцам права пры найме аддаваць прыярытэт аўстрыйцам перад грамадзянамі іншых краін Еўрасаюза, паведамляе Бі-бі-сі.
Цяпер у аб'яднанай Еўропе дзейнічае агульны рынак працы: грамадзяне ўсіх дзяржаў, якія ўваходзяць у ЕС, паводле закона маюць роўныя правы пры прыёме на працу ў любой з краін саюза. Аддаваць прыярытэт грамадзянам якой-небудзь краіны заканадаўча забаронена.
Керн паабяцаў звярнуцца з адпаведнай просьбай да лідараў ЕС падчас выступу на мерапрыемстве, прысвечаным старту 10-гадовага плана эканамічнага развіцця, у якім асаблівая ўвага павінна быць нададзена стварэнню новых працоўных месцаў.
«Краіны Усходняй Еўропы экспартуюць сваё беспрацоўе ў Аўстрыю», — заявіў сацыял-дэмакрат Керн, выступаючы ў горадзе Вельс, дзе на выбарах перамагла ўльтраправая Партыя свабоды.
Папулярнасць Партыі свабоды ў Аўстрыі ў апошні час расце, шмат у чым з-за боязі жыхароў з прычыны іміграцыі і беспрацоўя.
Абяцанне Керна назіральнікі ацэньваюць як спробу прыцягнуць выбаршчыкаў, якія сімпатызуюць аўстрыйскім ультраправым.
