Zorki biełaruskaha TV: top-10 tych, chto syšoŭ z BT 27

6 studzienia ŭ efiry ANT źjavicca pieradača «Ja lublu Biełaruś» — zabaŭlalna-paznavalnaja pieradača ź Dzianisam Kurjanam u jakaści viadučaha. Hledačy ž pamiatajuć jaho pieradusim za košt pracy na Pieršym kanale (BT).

Pierachody z kanała na kanał topavych viadučych — redkaść dla biełaruskich realij.

Zvyčajna jany źjazdžajuć u Rasiju ci Ukrainu, i hublajucca dla ajčynnaha hledača.

«Naša Niva» skłała rejtynh 10 televiadučych apošnich hadoŭ, što syšli z pracy, jakaja pryniesła im viadomaść. Dzie ich možna ŭbačyć ciapier?

1. Siarhiej Darafiejeŭ. fota pinguin.by

10. Dzianis Suchavaraŭ

9. Alaksandr Martynienka

8. Saša Paŭłava

7. Lejła Ismaiłava. fota http://lavrenkina.livejournal.com

6. Alina Kraŭcova. fota pinguin.by

5. Juryj Kruhlik. fota pinguin.by

4. Artašes Antanian. fota pinguin.by

3. Dzianis Kurjan

2. Jahor Chrustaloŭ

10. Dzianis Suchavaraŭ (byłoje miesca pracy — ANT)

Imia hetaha reparciora mała što kaža šfrahovamu hledaču, adnak u 2008 hodzie jon vyjhraŭ «Televiaršyniu» za žurnalisckaje rasśledavańnie «hulniamanii».

«Prasłaviŭsia» na ŭsiu krainu jon paśla taho, jak sam trapiŭ pad kryminalnuju spravu nibyta za machinacyi z kredytami, jakija, jak śćviardžała śledstva, spuskaŭ u kazino i na hulniavych aŭtamatach.

Pa słovach Suchavarava, jon zapiŭ i prajhraŭ hrošy ŭ kazino. «Paśla pryjšło asensavańnie, što na mnie pavis vialiki doŭh. Maralna było vielmi składana. Treba było źmianiać abstanoŭku i ja sarvaŭsia ŭ Rasiju», — uzhadvaŭ jon.

Suchavaraŭ znajšoŭ pracu ŭ rasijskich «Viestiach», kali była vyniesiena pastanova ab jaho zatrymańni.

Pieršy sud vynies Suchavaravu prysud u piać hadoŭ z kanfiskacyjaj, ale potym hety prysud byŭ abskardžany i admienieny, a sam Dzianis Suchavaraŭ — apraŭdany.

Paśla hetaha były reparcior pačaŭ sudzicca ź niezaležnymi ŚMI — patrabavać kampiensacyju za pryčynienuju maralnuju škodu.

Praź niekatory čas Suchavaraŭ padrabiazna raskazaŭ pra svaju kryminalnuju spravu ŭ intervju «Biełhaziecie», a paśla i sam staŭ drukavacca tam. Darečy, na staroncy «kryminał».

9. Alaksandr Martynienka — tok-šoŭ «Chod u adkaz» («Otvietnyj chod») na Pieršym kanale

Hod tamu, 17 śniežnia 2011 ukazam prezidenta byŭ adpraŭleny ŭ adstaŭku namieśnik staršyni Biełteleradyjokampanii Alaksandr Martynienka.

Imia hetaha niepubličnaha čałavieka — što dziŭna dla televizijonščyka, — z taho času tak i nie źjaviłasia ŭ navinach.

Vychadziec z Brestčyny i vypusknik žurfaka BDU, Martynienka vioŭ tok-šoŭ «Chod u adkaz» («Otvietnyj chod») i navat atrymaŭ u 2009 hodzie zvańnie najlepšaha viadučaha hramadska-palityčnaj prahramy.

Adnak viadomym Martynienka byŭ nie tolki jak televiadučy, ale i jak muž Natalli Piatkievič — pres-sakratarki Łukašenki, pieršaj namieśnicy kiraŭnika Administracyi prezidenta, a ciapier daradcy kiraŭnika dziaržavy. Šlub byŭ zarehistravany ŭ 2009 hodzie, za dzień da pieramožnaj dla Martynienki televiaršyni.

Letaś čutki ŭ internecie «raźviali» Martynienku i Piatkievič, adnak dakumientalna infarmacyja nie paćvierdziłasia.

8. Saša Paŭłava — «Muzyčny sud», «Začystka» na ANT

Hramadzianka Niderłandaŭ, pieramožca «Apošniaha hieroja» i byłaja zorka «Płejboja» Volha Urašova ŭvarvałasia na biełaruskaje telebačańnie ŭ 2009 hodzie.

Užo jak Alaksandra Paŭłava — u novaje žyćcio z novym imiem, vyrašyła jana, i źmianiła proźvišča ŭ pašparcie.

Jana naradziłasia ŭ Minsku, ale paśla zakančeńnia škoły i čatyroch kursaŭ fakulteta mižnarodnych adnosinaŭ BDU źjechała ŭ Hałandyju, dzie i zdabyła viadomaść.

Saša Paŭłava źjaviłasia ŭ efiry prahramy «Muzyčny sud», ale mnohija ŭklučali pieradaču nie dla taho, kab pasłuchać biełaruskuju papsu, a palubavacca simpatyčnaj viadučaj. Na telebačańni jana pratrymałasia dva hady.

Nie abyšłosia i biez «Televiaršyni», jakuju Paŭłava atrymała jak najlepšaja viadučaja muzyčna-zabaŭlalnaj pieradačy.

«Maskva, Kijeŭ ci Jeŭropa. Razhladaju najlepšuju prapanovu», — skazała jana ŭ kancy 2011 hoda pra svaje płany paśla zvalnieńnia z ANT. Adnak pra novuju emihracyju i prafiesijnyja dasiahnieńni Sašy nie čuvać — zaciahnuli adnosiny. U śvieckaj chronicy jana pastajanna fihuruje pobač z salistam hurta «Čuk i Hiek» Paŭłam Syraježkinym.

7. Lejła Ismaiłava — dziciačaje «Jeŭrabačańnie-2010» na Pieršym kanale

Lejła zapomniłasia hledačam jak adna ź viadučych dziciačaha «Jeŭrabačańnia-2010» u Minsku. Za hety razam ź Dzianisam Kurjanam jana i atrymała «Televiaršyniu» jak najlepšaja viadučaja muzyčna-zabaŭlalnaj pieradačy.

U televizar jana traplała i zdymajučysia ŭ rekłamie — «Śvitanak», «Savuškaŭ pradukt»…

Lejła naradziłasia ŭ Ahdamie, heta horad u Nahornym Karabachu, na samaj miažy z Azierbajdžanam. U pačatku 1990-ych, kali na Kaŭkazie razharnulisia vajennyja dziejańni, siamja Ismaiłavych pierajechała ŭ Baku. Paśla śmierci baćki było vyrašana rušyć u Minsk — na radzimu maci Lejły.

U Biełarusi maładaja viadučaja skončyła licej BDU, fakultet žurnalistyki BDU.

Pa stypiendyi Jeŭrakamisii jana paśpieła pavučycca pa abmienie ŭ Hrecyi, a ciapier, niejak paźbiehnuŭšy surovaha biełaruskaha raźmierkavańnia, źjechała ŭ Łos-Anželes spaścihać kinaindustryju.

6. Alina Kraŭcova — «Kulturnyja ludzi» na Pieršy kanale

Zakončyŭšy ŭ 2004 hodzie histfak BDU, Alina Kraŭcova adrazu pačała vieści naviny na BT. U 2007 hodzie jana stvaryła prahramu «Kulturnyja ludzi», ź jakoj pazaletaś uziała «Televiaršyniu». Narešcie, paśpieła zaśviacicca ŭ jakaści viadučaj u «Zornych tancach» i «Słavianskim bazary».

«Dla mianie nie maje vialikaha značeńnia miesca. U mianie jość svaje mety i zadačy — i heta hałoŭnaje.

I ŭ jakim horadzie dla ich realizacyi składziecca najbolš spryjalnaja abstanoŭka, tam i zastanusia», —

pryznavałasia Kraŭcova.

Ciapier takaja situacyja skłałasia ŭ Pieciarburhu.

Kraŭcova — adna z dvuch viadučych kryminalnaj chroniki «Miesto proisšiestvija» na miascovym 5 kanale.

Adnačasova jana atrymlivaje treciuju adukacyju — vučycca na režysiora ŭ Sankt-Pieciarburhskim univiersitecie kino i telebačańnia. Pierad tym jana paśpieła skončyć Vyšejšuju nacyjanalnuju škołu telebačańnia i radyjo ŭ Maskvie.

5. Juryj Kruhlik — «Panarama» na Pieršym kanale

Jašče adnaho biełarusa na pieciarburhskim «5 kanale» my pastavili na prystupku vyšej, tamu što jaho ŭziali vieści naviny, a nie tolki kryminalnuju chroniku.

Były dyktar «Panaramy» i viadučy «Dziaciej novaha pakaleńnia», uładalnik «Televiaršyni»-2007 Juryj Kruhlik ciapier źjaŭlajecca ŭ kadry ŭ navinnaj pieradačy «Tiepieŕ».

Kruhlik naradziŭsia ŭ Maładziečnie. Paśla zakančeńnia Instytut kultury (BDUKM) i słužby ŭ armii, jon uładkavaŭsia ŭ Biełteleradyjokampaniju. Karjerny rost pačaŭsia z pasady viadučaha rehijanalnych navinaŭ na ŁADzie, a praciahnuŭsia na Pieršym kanale. Adtul letaś jon i źjechaŭ u Pieciarburhu.

4. Artašes Antanian — «Naviny sporta» na ANT

Najlepšy spartyŭny kamientatar Biełarusi 2009 hoda, jaki zapomniŭsia zaŭziataram sarkastyčnym kamientavańniem hulniaŭ futbolnaj zbornaj Biełarusi, letaś źjechaŭ u Maskvu.

Tam jon pracuje ŭ «razmoŭnym žanry» na televizijnym kanale «Kamsamolskaj praŭdy», a taksama kamientuje spartyŭnyja spabornictvy na padraździaleńniach kanała «Rasija» — «Rasija-2», «Sport-1» i «Sport-2».

U Biełarusi jon pačynaŭ dzi-džejem na radyjo «Brest», a paśla pierabraŭsia ŭ stalicu, dzie jaho hołas možna było pačuć na «Radyjo Bi-Ej».

3. Dzianis Kurjan — «Śfiera intaresaŭ», «Aktualnaje intervju», «5×5», «Sportłato» na Pieršym kanale

Topavy viadučy syšoŭ ź Pieršaha kanała ŭ kancy 2012 hoda.

Pa biełaruskich mierkach śpis jahonych dasiahnieńniaŭ vyhladaje ŭnušalna i raznapłanava — niekalki aŭtarskich pieradač, status najlepšaha reparciora 2006 hoda, najlepšaha viadučy muzyčna-zabaŭlalnaj pieradačy 2011 hoda, pryz hladackich simpatyj «Televiaršyni»-2009. Aproč taho, dźvie vyšejšyja adukacyi — u Akademii kiravańnia i ŭ BDU (sumiesna z Ryžskaj biznes-škołaj).

Pra Kurjana možna skazać, što jon vyras na telebačańni. Viadučym u moładzievaj pieradačy «5×5» jon staŭ u dalokim 2000 hodzie, kali jamu było ŭsiaho 16 hadoŭ. I voś ciapier pryjšoŭ čas raźvitacca z BT. «Vialikija prajekty, jakija byli b cikavyja mnie, u bližejšy čas kiraŭnictvam Biełteleradyjokampanii nie zapłanavanyja. A siadzieć i čakać čahości ja nie pryvyk. Tym bolš što takija prajekty mohuć źjavicca dzieści jašče», — skazaŭ jon u intervju «Kamsamołcy». Dzieści jašče akazałasia susiednim ANT. Choć Kurjana aktyŭna svatali ŭ Maskvu —

letaś jon paśpiachova adpracavaŭ viadučym vialikaha kancerta na Krasnaj Płoščy, pryśviečanaha Dniu Rasii.

Byli, pa jaho słovach, prapanovy i z Ukrainy.

Zrešty, Kurjan jašče davoli małady viadučy, jamu tolki 28 hadoŭ. Na miescy jaho trymajuć i małyja dzieci — letaś naradziłasia dačka Miłana. A synu Kiryłu, nazvanamu ŭ honar pravasłaŭnaha patryjarcha ŭžo amal try hady.

2. Jahor Chrustaloŭ — «Krok», «Karambol», «Usio narmalna, mama», «U džazie tolki dziaŭčyny», «Vybar»

Imia hetaha televiadučaha hrymieła ź siaredziny 1990-ych.

Jon, syn dyrektara stadyjona «Dynama», byŭ adnym ź simvałaŭ novaha biełaruskaha telebačańnia.

U 2003 hodzie Jahor staŭ viadučym tok-šoŭ «Vybar», pieraniaŭšy estafietu ŭ Uładzimira Mackieviča, jakomu dali pravieści tolki vosiem vypuskaŭ. Pry Chrustalovie prahrama stała bolš łahodnaj. Na čale z novym viadučym jana išła ŭ efiry šeść hadoŭ, patrochi hublajučy svaju vastryniu.

Viaršyniaj biazzubaści «Vybara» stała pieradača, u jakoj ekśpierty ŭ studyi na poŭnym surjozie abmiarkoŭvali, ci pryjdzie ŭ Biełaruś viasna, i prapanoŭvali prahałasavać telehledačam.

Zrešty, Chrustaloŭ žyŭ nie adnym «Vybaram». Jon byŭ hienieralnym pradziusaram ANT, stvaraŭ «Pieśni majoj krainy», «Noč opiery ŭ Mirskim zamku» i inšyja prajekty.

Aproč taho, Chrustaloŭ pisaŭ pieśni dla mnohich zorak biełaruskaj estrady. Supracoŭnictva sa śpiavačkaj Halinaj Šyškovaj zajšło daloka — tak u Chrustalova naradziŭsia pazašlubny syn.

U 2009 hodzie televiadučy kardynalna źmianiŭ žyćcio i źjechaŭ u Maskvu, dzie staŭ pradziusaram śpiecyjalnych prajektaŭ na rasijskim zabaŭlalnym kanale STS. Bolš u efiry jon nie źjaŭlaŭsia.

1. Siarhiej Darafiejeŭ — «Dobraj ranicy, Biełaruś!», «Vybar», ANT

Adna z hałoŭnych zorak biełaruskaha, a ciapier i ŭkrainskaha telebačańnia zakončyŭ BNTU, a žurnalisckuju adukacyju atrymlivaŭ za miažoj, vyjhraŭšy hrant Dziarždepartamienta ZŠA. Viadomaść jamu pryniesła praca na ANT.

Pra roźnicu pamiž Chrustalovym i Darafiejevym, jaki staŭ viadučym «Vybara» paśla Jahora, najlepš śviedčyć naminacyja, u jakoj kožny ź ich vyjhravaŭ «Televiaršyniu».

Pieradaču Chrustalova ŭ 2006 hodzie nazvali zabaŭlalnaj prahramaj, a voś u Darafiejeva ŭ 2010 heta była hramadska-palityčnaja prahrama…

Efir «Vybara» 19 śniežnia 2010 hoda kardynalna źmianiŭ žyćcio viadučaha.

Paśla taho, jak na nastupny dzień Alaksandr Łukašenka publična vykazaŭ svaju niezadavolenaść efiram, pierśpiektyŭ na biełaruskim telebačańni dla Darafiejeva nie było.

Pieradača apynułasia ŭ «tvorčym adpačynku». Pramajaŭšysia niekalki miesiacaŭ biez efiru, Darafiejeŭ syšoŭ kančatkova.

A Darafiejeŭ pierajechaŭ u Kijeŭ, dzie pačaŭ pracavać na 5 kanale. Moŭny barjer nie staŭ pieraškodaj. Jahony tata — ukrainiec, baćki vučylisia ŭ Kijevie i razmaŭlali pa-ŭkrainsku.

Ciapier jon viadzie subotniuju prahramu «Partrety ź Siarhiejem Darafiejevym». U kancy minułaha hoda jon vyjhraŭ ukrainskuju premiju «Teletryumf» u naminacyi «Intervjujer».

«Pracavać ciapier na biełaruskim telebačańni — voś što złačynstva, — kazaŭ jon niadaŭna. — Da 19 śniežnia 2010 hoda dla mianie była adna Biełaruś, potym Biełaruś stała inšaja».

Jahor Marcinovič

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH