Brušny tyf dyjahnastavany nie mienš jak u dvuch biełarusaŭ, jakija naviedvali Maskoŭskuju vobłaść hetaj vosieńniu.
Jak paviedamlaje sajt Bresckaha abłasnoha centra hihijeny, epidemijałohii i hramadskaha zdaroŭja, u listapadzie ŭ pryvatnym internacie Padolska (Maskoŭskaja vobłaść) była zarehistravana ŭspyška brušnoha tyfu. U tym liku i dźvie žycharki Bresckaj vobłaści trapili ŭ padolskuju infiekcyjnuju balnicu. U adnoj ź ich dyjahnaz paćvierdžany ŭžo.
Akramia taho, brušny tyf byŭ dyjahnastavany ŭ žychara Kiraŭskaha rajona Mahiloŭskaj vobłaści, jaki taksama znachodziŭsia ŭ Padolsku i 27 listapada viarnuŭsia na radzimu.
Pavodle źviestak BACHEiHZ, apošnim razam hetaje infiekcyjnaje zachvorvańnie było zarehistravana ŭ Bresckaj vobłaści 14 hadoŭ tamu.
Dla praduchileńnia hrupavoha zachvorvańnia na brušny tyf i paratyfy abłasnaja sanitarna-epidemijałahičnaja słužba pravodzić kompleks supraćepidemičnych i prafiłaktyčnych mierapryjemstvaŭ, havorycca ŭ paviedamleńni.
Brušny tyf — vostraja kišečnaja infiekcyja, jakaja vyklikajecca bakteryjami Salmonella typhi. Zachvorvańnie charaktaryzujecca lichamankaj, ahulnaj intaksikacyjaj z raźvićciom tyfoznaha statusu (rezka vyražanaja zatarmožanaść, ahłušanaść, blednaść skurnych pokryvaŭ, parušeńnie śviadomaści, tryźnieńnie, halucynacyi, dryžańnie kaniečnaściaŭ), skurnym sypam, pavieličeńniem piečani i sielazionki, paražeńniem limfatyčnaj sistemy nižniaha adździeła tonkaj kiški.
Krynicaj zachvorvańnia źjaŭlajecca chvory čałaviek abo bakteryjanośbit, uzbudžalnik traplaje ŭ navakolnaje asiarodździe z mačoj, ślinaj, vyparažnieńniem. Infiekcyja pieradajecca vodnym, charčovym i kantaktna-bytavym šlacham (brudnyja ruki, bializna, posud, dźviarnyja ručki). U vodapravodnaj vadzie ŭzbudžalnik brušnoha tyfu zachoŭvajecca da troch miesiacaŭ, u kałodziežach — da šaści miesiacaŭ. Žyvatvornym asiarodździem dla zachavańnia i razmnažeńnia salmanieł źjaŭlajucca charčovyja pradukty — miasny farš, sałaty z aharodniny, małako, śmiatana, tvaroh.
