Viadomy rasijski piśmieńnik žorstka raskrytykavaŭ ułady svajoj krainy za ŭvarvańnie va Ukrainu.
Pra heta Barys Akunin napisaŭ u svaim akaŭncie ŭ sacyjalnaj sietcy «Fejsbuk».
«Ja ciapier dumaju nie pra Ukrainu. Heta značyć, i pra Ŭkrainu, viadoma, taksama, ale heta ŭrešcie rešt choć i rodnasnaja, ale inšaja kraina, u jakoj svoj šlach. Ja žadaju hetaj krainie ŭsiaho samaha lepšaha. Jana dakazała mužnaściu i kryvioj, što jana — Kraina. Dumaju, usio ŭ jaje budzie dobra i biez Kryma.
Zachad nie paskvapicca na dapamohu, kab zrabić Ukrainu vitrynaj demakratyčnych kaštoŭnaściaŭ. Krymčanie, napeŭna, jašče horka paškadujuć, što adździalilisia»,
— piša Akunin.
Pavodle jaho słoŭ, značna bolš jaho zaraz zajmaje budučynia ŭłasnaj krainy, Rasii, i jana «vyhladaje zmročna».
«Ja chaču spytać tych suajčyńnikaŭ, chto burna radujecca budučamu, zahadzia pradvyznačanamu dałučeńniu Kryma (a takich, zdajecca, bolšaść): pavažanaja bolšaść, ty choć razumieješ, u što nam usim abydziecca hety trafiej? Nie?
U vyniku taho, što Rasieja ŭviała na terytoryju inšaj dziaržavy svaje ŭzbrojenyja čaści, adbudziecca nastupnaje:
— Rasija apyniecca spačatku ŭ palityčnaj izalacyi, a zatym i ŭ ekanamičnaj. Hrošy spłyvuć za miažu, inviestycyj nie budzie, a našamu hazu i našaj nafcie śviet chutka znojdzie zamienu, tak što paliŭnyja zvyšprybytki skončacca.
— Usio heta razam ź nieminučym skokam vajennych vydatkaŭ paciahnie za saboj spad ekanomiki i padzieńnie rubla, a zatym, vierahodna, i admienu jaho kanviertavalnaści. Tak što z Antalijaj, Jehiptam i Tajłandam pryjdziecca raźvitacca.
— Rezka padaražejuć impartnyja tavary, a mnohija prosta źniknuć.
— Valutnych zapasaŭ chopić nienadoŭha. Kab było čym płacić zarobki i piensii, urad uklučyć drukavalny stanok. Heta pryviadzie da inflacyi i jašče bolšaha rostu koštaŭ. A potym płacić biudžetnikam usio roŭna nie stanie čym. I dziaržava stanie bankrutam.
—Dla taho, kab hasić niezadavolenaść, što budzie ŭzrastać, režymu daviadziecca pavodzić siabie ŭsio bolš žorstka, usio bolš biezzakonna, Internet budzie spakładany i cenzuravany; pra zvyčajnyja ŚMI niama čaho i kazać. Kolkaść palitviaźniaŭ budzie ŭvieś čas pavialičvacca, i ŭ hetuju katehoryju pačnuć traplać ludzi, dalokija ad palityki. Luby pratest budzie karacca», — piša jon.
«Tak, dziakujučy krymskaj avantury Pucin zabiaśpiečyŭ sabie pažyćciovuju ŭładu. Prysudziŭ siabie da jaje. Zaraz jon prosta pabaicca sychodzić u adstaŭku. Ale tolki pažyćciovaść hetaja naŭrad ci akažacca doŭhaj. I skončycca jana viadoma čym.
Kali niama lehalnaha miechanizmu źmieny zbankrutavanaha režymu, uklučajucca miechanizmy revalucyjnyja. A revalucyja ŭ šmatnacyjanalnaj krainie, jakaja da taho ž vałodaje jadziernaj zbrojaj, heta vielmi strašna.
Ja nie pałochaju i nie karkaju. Na žal, usio heta nie prosta vielmi vierahodna, a praktyčna niepaźbiežna. Chiba što adbudziecca cud. Adnym słovam, z budučynym dałučeńniem Kryma ciabie, biednaja radasnaja bolšaść», — zaklučaje Barys Akunin.
