Hramadski aktyvist, były palitviazień, lidar moładzievaha kryła «Źmiena» Pavał Vinahradaŭ siońnia dniom, 13 sakavika, pajšoŭ adznačycca ŭ inśpiekcyju Maskoŭskaha r-na (jon znachodzicca pad nahladam). Ź im byŭ i jaho paplečnik Alaksandr Arcybašyŭ. A potym suviaź ź imi abarvałasia na niekalki hadzinaŭ.
Na telefanavańni chłopcy doŭhi čas nie adkazvali.
Uviečary Vinahradava znajšli ŭ sumnaviadomym centry izalacyi pravaparušalnikaŭ na Akreścina. Arcybašyva doŭhi čas nie mahli znajści, urešcie jaho taksama pryvieźli na Akreścina.
Mašynu, na jakoj byli chłapcy, žonka Vinahradava Śviatłana znajšła na štraf-stajancy.
U piatnicu, 14 sakavika, sud u sudzie Maskoŭskaha r-na.
Nijakaj akcyi ŭ toj dzień chłopcy nie płanavali. Taksama časam zatrymańni ŭ Minsku praktykujucca napiaredadni niejkich hramadska značnych akcyj, abo pryjezdu ŭ Minsku VIPaŭ ź blizkaha Uschodu (Rasii).
Paŭła paśla 15-sutkavaha aryštu, 12 kastryčnika 2013 h., kab paplečniki nie sustreli, milicyja z Akreścina vyviezła až pad Nacyjanalny aeraport. Na fota — Pavieł i jaho žonka Śviatłana.
Nahadajem, što Pavieł Vinahradaŭ byŭ fihurantam kryminalnaj spravy ab masavych biesparadkach 19 śniežnia 2010 h. i byŭ asudžany na čatyry hady źniavoleńnia ŭ kałonii strohaha režymu. U vieraśni 2011 h. jon byŭ vyzvaleny na asnovie ŭkazu Łukašenki, choć sam pamiłavańnia nie prasiŭ.
Z 10 krasavika 2012 h. da Paŭła byŭ prymienieny režym previentyŭnaha nahladu na dva hady.
Jon pavinien być doma paśla 20:00 i da 7:00, jamu zabaroniena pakidać stalicu biez dazvołu milicyi.
Bolš žorstki režym matyvavali tym, što Pavieł nie kinuŭ hramadskaj dziejnaści, niekalki razoŭ pryciahvaŭsia da adm. adkaznaści (pravodziŭ niekalki hučnych akcyj, a termin adbytych na Akreścina sutak nabližajecca ŭžo da 100).