Paćvierdžanyja dźvie śmierci padčas sutyknieńniaŭ u Daniecku pamiž prarasiejskimi aktyvistami i mitynhoŭcami za adzinstva Ukrainy. 1 čałaviek pad pytańniem — ci žyvy ci miortvy. 1 u ciažkim stanie, apierujuć. 2 u vielmi ciažkim. Paciarpieli prynamsi 50 čałaviek», — havorycca ŭ paviedamleńni, jakoje cytuje UNIAN.
fota z fb Siarhieja Hryca
U čaćvier u Daniecku z 18:00 da 19.00 prachodziŭ mitynh u padtrymku cełasnaści Ukrainy. Ludzi samaarhanizavalisia ŭ sacyjalnych sietkach i vyjšli na vulicu, kab vykazać svoj pratest suprać ahresiŭnaj palityki kiraŭnictva Rasijskaj Federacyi i prajavaŭ sieparatyzmu va Ukrainie.
Pa dadzienych «Ostrava», atrymanych z krynic u pravaachoŭnych orhanach, adzin z zahinułych pamior u vyniku nažavoha ranieńnia. Jamu było 22 hady, jon pamior u mašynie chutkaj dapamohi.
17 čałaviek źviarnulisia pa mieddapamohu.
Aściarožna, na videa — niecenzurnaja łajanka.
Bolš za 1000 ahresiŭna nastrojenych prarasiejskich aktyvistaŭ napali na ŭdzielnikaŭ mitynhu za adzinstva Ukrainy na płoščy Lenina. Spačatku jany zakidali svaich apanientaŭ jajkami, pietardami i dymavymi šaškami, a kali mitynh skončyŭsia, pačali bić udzielnikaŭ akcyi.
Kala pomnika Leninu prarasiejskija aktyvisty chacieli zładzić samasud nad adnym z «zaukraincaŭ». Źbitaha mužčynu pastavili na kaleni i pasprabavali «sudzić» jaho. Pry hetym mnohija ŭdzielniki prarasijskaj akcyi vystupili suprać samasudu. «My nie fašysty», — kazali jany.
Umiašałasia milicyja i vyvieła paciarpiełaha. Jaho adviali ŭ mašynu chutkaj dapamohi.
Milicyja zatrymała ahresiŭnych prarasiejskich aktyvistaŭ. Adnak 500 čałaviek prarvalisia da aŭtazaka i zapatrabavali vypuścić zatrymanych. Jany kryčali: «Davaj!», razhojdvali aŭtazak i prabili koły milicejskim mašynam.
Milicyja pad naciskam prarasiejskich aktyvistaŭ adpuściła zatrymanych.
Śviedka padziejaŭ, fotakarespandent ź Biełarusi Siarhiej Hryc, napisaŭ na svajoj staroncy ŭ Fejsbuku: «10 chvilin nazad hetyja ludzi stajali na płoščy i śpiavali himn Ukrainy, a niedaloka z płakatami «Pucin, vyratuj nas» stajali tyja, chto ličyć siabie haspadarami Danbasa, i kidali ŭ tych, što śpiavajuć, kamiani, butelki, jajki, pietardy, kiefir, šary z farbaj. Potym jany prarvali kvołaje ačapleńnie hultajavataj milicyi i akružyli tych, što ŭžo nie śpiavajuć. Adzin zabity, šmat paranienych. Taki Danieck».
