Elektronny prajazny treba budzie kožny raz padnosić da validatara, fota Kiryły Chilko.
Ale možna budzie karystacca zvyčajnymi tałončykami, jakija ciapier rehistrujuć u śpiecyjalnym kampościery, fota Kiryły Chilko
15 sakavika ŭ Minsku pačniecca prodaž elektronnych prajaznych biletaŭ na ŭsie vidy transpartu. Ab hetym paviedamiła namieśnik hienieralnaha dyrektara dziaržaŭnaha pradpryjemstva «Minsktrans» Iryna Jakuboŭskaja.
Elektronny prajazny budzie ŭjaŭlać saboj płastykavuju kartku (bieskantaktnaja smart-karta) nakštałt bankaŭskaj kartki, siniaha koleru z łahatypam «Minsktransa» i vyjavaj vidaŭ transpartu.
Jak i raniej papiarovyja prajaznyja, jany buduć pradavacca na 10, 15 dzion, miesiac i pačnuć dziejničać 1 krasavika», — paviedamiła Jakuboŭskaja.
Pavodle jaje słoŭ, na elektronny bilet budzie naličvacca košt, anałahičny koštu papiarovych prajaznych.
Akramia hetaha, treba budzie zapłacić załohavy košt — 12 tysiač rubloŭ.
Taksama źjavicca mahčymaść kupić prajazny na 5, 10 i bolš pajezdak.
Prajazny tolki na mietro pakul budzie pradavacca na radyjokartach. Karty z mahnitnaj stužkaj pastupova vyvodziacca z abaračeńnia.
Pry ŭvachodzie ŭ transpart uładalniku elektronnaha prajaznoha treba budzie padnieści jaho da validatara (pryłada dla pravierki dakumientaŭ na elektronnych nośbitach), jaki śvietłavym i hukavym sihnałami pakazvaje, što pajezdka apłačana.
Pravierku apłaty buduć ažyćciaŭlać kantralory, jakich zabiaśpiečać adpaviednymi terminałami.
Pryčym pierad zachodam kantraloraŭ u sałon validatary buduć błakiravacca.
Prodaž elektronnych prajaznych budzie ažyćciaŭlacca ŭ 139 kijoskach ahienctva «Minsktrans» i ŭ kasach mietrapalitena.
Razam z elektronnymi prajaznymi ŭ dziejańni zastajucca adnarazovyja žetony na pajezdku ŭ mietro, a taksama papiarovyja prajaznyja bilety na adnu pajezdku ŭ naziemnym transparcie.