Pra heta Siarhiej Łaŭroŭ paviedamiŭ na pres-kanfierencyi ŭ Łondanie ab vynikach sustrečy z Džonam Kiery.
«Što da praktyčnych zachadaŭ, jakija mahli b užyć zamiežnyja krainy, to ŭ nas niama ahulnaha bačańnia situacyi, razychodžańni zachoŭvajucca, ale razmova była, biezumoŭna, karysnaj», - zajaviŭ kiraŭnik MZS RF.
Rasiejski ministr uvažaje za niepatrebny praciah abmierkavańnia da praviadzieńnia refierendumu ŭ Krymie 16 sakavika.
Prapanovy Zachadu ab kantaktnaj hrupie va Ukrainie ŭ ciapierašnim vyhladzie Łaŭroŭ nazvaŭ nieprymalnymi.
«Kantaktnaja hrupa ŭ tym vyhladzie, u jakim jana ciapier prapanujecca našymi zachodnimi partniorami, zychodzić z taho, što metaj hetaha šmatbakovaha pracesu pavinna być pryjańnie naŭprostavamu dyjałohu pamiž Ukrainaj i RF. Nam zdajecca, što heta adkrytaja padmiena paniaćciaŭ, tamu što kryzis paŭstaŭ nie ź viny RF», — zajaviŭ jon.
Łaŭroŭ padkreśliŭ, što Rasiei «nie patrebnaja nijakaja mižnarodnaja struktura dla taho, kab razhladać rasiejska-ŭkrainskija stasunki».
Kiraŭnik dypłamatyčnaj ustanovy RF adznačyŭ, što Krym źjaŭlajecca vielmi važnym dla Rasiei: «Ci jość precedenty ŭ mižnarodnym pravie, ci niama precedentaŭ — a jany jość —
usio razumiejuć, i heta ja adkazna zajaŭlaju, što značyć Krym dla Rasiei, a jon značyć nievymierna bolš, čym Kamory dla Francyi ci Fołkłendy dla Vialikabrytanii», - skazaŭ jon.
Łaŭroŭ paprasiŭ zachodnich partnioraŭ nie razhladać vypadak z Krymam «izalavana ad historyi».
«Pierakanany: kali Kosava — asablivy vypadak, to Krym - nie mienš asablivy vypadak», — padkreśliŭ jon.
