Kamanda Alaksandry Łokvud (Technałahičny instytut Kalifornii) vyjaviła ŭ atmaśfiery płaniety-hihanta za miežami Soniečnaj sistemy vadziany par.
Daśledavańni, padrabiaznaje apisańnie jakich apublikavana ŭ apošnim numary časopisa Astrophysical Journal Letters, vialisia na Havajach, u Absiervatoryi Kieka, pry dapamozie składanaj techniki na asnovie Dopleraŭskaha efiektu.
Taŭ Vałapasa b, tak nazvali vyvučajemaje niabiesnaje cieła, abaročvajecca vakoł svajoj zorki, jakuju nazyvajuć Taŭ Vałapasa A, usiaho za 3,3 dnia.
Mastackaja vyjava haračaha płanietarnaha abjekta.
Pakolki arbita Taŭ Vałapasa b zanadta nabližana da śviaciła, hetaja płanieta nahravajecca da vielmi vysokich tempieratur, tamu vada na płaniecie moža isnavać tolki ŭ vyhladzie vysokatempieraturnaj pary.
Navukoŭcy zdoleli vyličyć masu Taŭ Vałapasa b. Jana akazałasia roŭnaj 5,9 ad masy Jupiciera.
Užyty navukoŭcami mietad dazvalaje vyjaŭlać vadu tolki ŭ atmaśfiery vialikich «haračych» płanietarnych abjektaŭ, blizkich pa pamierach da zorak. Ale u 2018 hodzie budzie ŭviedzieny ŭ dziejańnie teleskop ź infračyrvonym śpiektram «Džejms Ueb», jaki daść šaniec «ŭbačyć» mienšyja pa pamiery chałodnyja płaniety.
A heta dazvolić navukoŭcam adšukać vadu ŭ suśvietach, padobnych ziamnym.
