Jehipiecki sud pryhavaryŭ 528 prychilnikaŭ skinutaha prezidenta Machamieda Mursi da śmiarotnaha pakarańnia. Ich pryznali vinavatymi ŭ zabojstvie palicejskaha, napadach na ludziej i źniščeńni pryvatnaj ułasnaści.
Usiaho śledstva viadziecca ŭ dačynieńni da 1200 prychilnikaŭ Mursi, u lik jakich uvachodziać vysokapastaŭlenyja siabry ruchu «Braty-musulmanie».
Paśla źviaržeńnia Machamieda Mursi ŭ lipieni minułaha hoda novyja ŭłady stali pieraśledavać siabraŭ ruchu «Braty-musulmanie» i inšych prychilnikaŭ byłoha prezidenta, u vyniku čaho sotni aktyvistaŭ byli zabityja, a tysiačy — aryštavanyja.
Čakajecca, što pryhavoranyja da śmierci padaduć apielacyju. Pavodle słovaŭ karespandenta Bi-bi-si Arły Hieryn ŭ Kairy, nastupnym krokam u sudovym pracesie budzie pieradača prysuda viarchoŭnamu mufciju Jehipta, jaki pavinien ŭchvalić rašeńnie suda. Zaviaršalnaja častka sudovaha pracesu adbudziecca 28 krasavika. Takim čynam, navat u vypadku adabreńnia prysudu mufcijem, u asudžanych zastaniecca dosyć času na apielacyju.
Udzielniki kampanii za vyzvaleńnie prychilnikaŭ Mursi adznačajuć, što chocia ŭ Jehipcie davoli časta vynosiacca śmiarotnyja prysudy, ich redka pryvodziać u vykanańnie.
Pavodle słovaŭ aficyjnaha pradstaŭnika ruchu «Braty- musulmanie» Hiechada Chadada, vyniesienyja prysudy aznačajuć, što ŭ Jehipcie nastupiŭ dyktatarski režym.
«Mahčyma, heta tolki pahroza, i buduć apielacyi, paśla čaho sud źmienić svajo rašeńnie. Tym nie mienš heta novy Jehipiet paśla dziaržaŭnaha pieravarotu. Heta novaja dyktatura, jakuju sprabuje ŭstalavać ministr abarony fieldmaršał Abdel Fatach Sisi», — śćviardžaje Hiechad Chadad.
Jon taksama dadaŭ, što siarod inšych aktyvistaŭ da śmierci prysudžany lider ruchu «Braty- musulmanie» Machamied Badzi. Adnak zhodna ź inšymi krynicami, Badzi źjavicca ŭ sudzie tolki ŭ nastupny aŭtorak.
Prysud pry adsutnaści abvinavačanych
Prysudy byli vyniesienyja paśla dvuch sudovych pasiadžeńniaŭ u horadzie Mińnia, raźmieščanym u centralnaj častcy Jehipta. Advakaty abvinavačanych śćviardžajuć, što ŭ ich nie było mahčymaści pradstavić arhumienty abarony całkam.
Pavodle słovaŭ advakataŭ, sudździ, jakija vynieśli śmiarotnyja prysudy, «adchililisia ad usich jurydyčnych normaŭ» i nie dali abvinavačanym prava na sudovuju abaronu.
Na sudovym pracesie prysutničała kala 150 padazravanych. Takim čynam, prysud byŭ vyniesieny ŭ adsutnaści bolšaści abvinavačanych. Siarod inšych abvinavačvańniaŭ im inkryminujecca zabojstva kamandzira palicejskaj akruhi Maciej u horadzie Mińnia.
Sud taksama apraŭdaŭ 16 padsudnych. Druhaja hrupa z 700 prychilnikaŭ Mursi paŭstanie pierad sudom u nastupny aŭtorak.
Napady na palicejskich adbylisia ŭ žniŭni na poŭdni Jehipta paśla taho, jak siły biaśpieki źniščyli dva łahiery prychilnikaŭ Mursi ŭ Kairy i zabili sotni ludziej.
Mursi byŭ skinuty ŭ lipieni minułaha hoda. Uśled za hetym jamu byli pradjaŭlenyja čatyry abvinavačvańni. Jaho sychodu papiaredničali šmattysiačnyja vuličnyja pratesty. Z času źviaržeńnia ŭradu Mursi siabry ruchu «Braty- musulmanie» i inšyja prychilniki Mursi padvierhlisia pieraśledu z boku novaha vajennaha ŭrada Jehipta. Sam ruch byŭ abvieščany terarystyčnaj arhanizacyjaj, a jaho dziejnaść apynułasia pad zabaronaj.
