Bilety na matč čempijanatu śvietu pa chakiei 2014 hoda Biełaruś — ZŠA, jaki adbudziecca 9 maja, pradadzieny całkam. Ab hetym, jak paviedamlaje pres-słužba prezidenta, zajaviŭ 8 krasavika na pasiadžeńni Savieta biaśpieki premjer-ministr Michaił Miaśnikovič.
Jon prainfarmavaŭ kiraŭnika dziaržavy ab praviedzienaj rabocie pa padrychtoŭcy da praviadzieńnia čempijanatu.
«Svoj udzieł u spabornictvach paćvierdzili ŭsie 16 krain. Za pieramohu ŭ čempijanacie buduć zmahacca kamandy sa Šviecyi, Čechii, Kanady, Słavakii, Narviehii, Danii, Francyi, Italii, Finlandyi, Rasii, ZŠA, Šviejcaryi, Hiermanii, Łatvii, Kazachstana i Biełarusi. «Alimpijski, sapraŭdy spartyŭny pryncyp pieramoh kan`iunkturnyja i niekanstruktyŭnyja zakliki», — adznačyŭ Miaśnikovič.
Pavodle słoŭ prem`ier-ministra, biletnaj prahramie była nadadziena asablivaja ŭvaha. Uličany vopyt, u tym liku niehatyŭny, inšych krain, jakija pravodzili padobnyja čempijanaty. Cenavaja palityka sfarmiravana takim čynam, što matčy zmohuć naviedać ludzi z roznym uzroŭniem dachodaŭ. Tak, na matčy papiaredniaha etapu ceny składajuć ad 6 da 50 jeŭra, na matč finalnaj stadyi — ad 25 da 400 jeŭra.
Pa stanie na 7 krasavika pradadziena i zabraniravana 354 tys. biletaŭ na «Minsk-Arenu» (75% ad umiaščalnaści) i 142 tys. — na «Čyžoŭka-Arenu» (67%). Zamiežnym haściam realizavana 70,5 tys. biletaŭ. Asnoŭnaja dola prodaž dla zamiežnych haściej prypadaje na Rasiju i Łatviju. Dastatkova vialikaja cikavaść taksama prajaŭlena balelščykami ź Finlandyi, Šviejcaryi, Hiermanii, Słavakii. Hramadzianie hetych krain na hety momant vykupili bolš jak pa 2—3 tys. biletaŭ.
Jak adznačyŭ Miaśnikovič, bilety na niarejtynhavyja matčy buduć realizavanyja ŭ pracoŭnych i studenckich kalektyvach. «Rabota arhanizavana. Prodaž biletaŭ sa źnižkaj dzieciam i moładzi praktykujecca ŭsiudy pry praviadzieńni čempijanataŭ. Heta ŭstalavanaja praktyka», — skazaŭ jon.
Vyrašanyja taksama ŭsie pytańni biaźvizavaha ŭjezdu haściej i ŭdzielnikaŭ čempijanatu. Vyznačana 15 asnoŭnych punktaŭ propusku cieraź miažu. Na kožnym ź ich uviedzieny «zialony kanał». Pahraničnyja pierachody ŭkamplektavanyja supracoŭnikami, jakija vałodajuć zamiežnymi movami. Adpracavany paradak razhladu sprečnych pytańniaŭ.
Pryniatyja rašeńni dla taho, kab Minsk byŭ maksimalna pryvabny dla turystaŭ. U pryvatnaści, zafiksavany ceny na haściničnaje absłuhoŭvańnie, a numarny fond haścinic pavialičany bolš čym u dva razy. Usiaho padčas čempijanatu buduć funkcyjanavać 43 haścinicy na 9 tys. 725 miescaŭ.
«Da čempijanatu płanavałasia ŭvieści ŭ ekspłuatacyju 14 haścinic. Dvanaccać ź ich uviedzieny pa stanie na 31 sakavika. Čatyry ŭžo pracujuć u paŭnacennym režymie, astatnija dastupnyja dla braniravańnia. Da 14 krasavika budzie ŭviedziena haścinica «Reniesans» i da 29 krasavika — haścinica «Piekin», — prainfarmavaŭ prem`ier-ministr. — Usie haścinicy adpaviadajuć ustanoŭlenym standartam. Na konkursnaj asnovie padabrany absłuhoŭvajučy piersanał».
Dla raźmiaščeńnia haściej čempijanatu taksama budzie zadziejničana piać internataŭ u studenckaj vioscy bolš čym na 5 tys. miescaŭ. Vyrašany ŭsie pytańni, źviazanyja z adsialeńniem na hety pieryjad studentaŭ biez spynieńnia vučebnaha pracesu. U reziervie jašče znachodziacca sanatoryi i haścinicy ŭ Minskaj vobłaści na 2 tys. 100 miescaŭ.
U pieryjad praviadzieńnia čempijanatu ŭ stalicy budzie razhornuta šyrokaja sietka hramadskaha charčavańnia. Dadatkova adkryjucca siezonnyja kafe bolš čym na 20 tys. miescaŭ u dapaŭnieńnie da 75 tys., jakija ŭžo jość. Raspracavany śpiecyjalnyja mieniu ŭ dastupnym cenavym dyjapazonie.
Akramia taho, kala Pałaca sportu na praciahu dvuch tydniaŭ čempijanatu z 11 da 23 hadzin buduć pracavać kirmašy narodnych i mastackich promysłaŭ. U hety ž pieryjad hości biełaruskaj stalicy zmohuć naviedać samyja papularnyja teatry, kinazały, muziei, vystavačnyja centry — hadziny pracy ŭsich ustanoŭ kultury buduć praciahnuty ŭ viačerni čas sutak.
Hatovy da pryjomu ŭdzielnikaŭ i haściej čempijanatu i nacyjanalny aeraport, značna pavialičana jaho prapusknaja zdolnaść, adznačaje pres-słužba prezidenta.
Dapamohu ŭ pracy z kamandami, aficyjnymi ŭdzielnikami i balelščykami buduć akazvać bolš čym 700 vałancioraŭ ź liku studentaŭ, jakija vałodajuć zamiežnymi movami. Jašče 190 studentaŭ mieduniviersiteta buduć pracavać u bryhadach chutkaj dapamohi i miedpunktach.
Sfarmiravana 20 bryhad nieadkładnaj miedycynskaj dapamohi na aŭtamabilach jeŭrapiejskich vytvorcaŭ z vopytnym piersanałam, jaki vałodaje zamiežnymi movami. Raspracavany schiemy raźmiaščeńnia hetych bryhad kala ladovych aren. Miedycynskija kabiniety na samich ladovych arenach asnaščanyja nieabchodnym abstalavańniem i lekavymi preparatami. Vyznačany pieralik arhanizacyj achovy zdaroŭja, u jakich u vypadku nieabchodnaści płanujecca akazańnie terminovaj miedycynskaj dapamohi haściam čempijanatu.
«Sur`ioznyja inviestycyi ŭ infrastrukturu i ab`iekty horada dazvolili stvaryć dadatkova bolš čym 2 tys. pracoŭnych miescaŭ, vyvieści na bolš jakasny ŭzrovień śfieru handlu, hramadskaha charčavańnia, bytavoha absłuhoŭvańnia, haściničnaha servisu, palepšyć transpartnaje zabieśpiačeńnie. Usio heta zroblena nie tolki dla čempijanatu, ale i dla palapšeńnia jakaści žyćcia haradžan. I ŭ pierśpiektyvie heta pryniasie dadatkovyja dyvidendy našaj krainie», — padkreśliŭ prem`ier-ministr.
