Pa zakančeńni čempijanatu śvietu pa chakiei ŭ Minsku Alaksandr Łukašenka paabiacaŭ surjozna ŭziacca za sport.
«Za sport voźmiemsia (voś projdzie čempijanat śvietu) tak, što ŭ kahości rebry traščać buduć, — skazaŭ Łukašenka. — Sport — heta vialikaja palityka, vy heta viedajecie. Siońnia, paśla pieramohi Domračavaj na sočynskaj Alimpijadździe, pra Biełaruś daviedalisia mnohija bolš, čym z časoŭ Uładzimira Lavonaviča (były kiraŭnik MZS Uładzimir Siańko, staršynia pastajannaj kamisii Savieta Respubliki pa mižnarodnych spravach i nacyjanalnaj biaśpiecy), kali jon u MZS pracavaŭ. Z-za adnaho čałavieka i jaje pośpiechu, dadajcie siudy frystajł i hetak dalej. Heta nie žart, hetym treba zajmacca».
Kiraŭnik dziaržavy źviarnuŭ uvahu, što ŭ Biełarusi šmat chakiejnych placovak, univiersalnych spartyŭnych zbudavańniaŭ, i častku hetaj infrastruktury nieabchodna pieradać spartyŭnym škołam, kab tam rychtavałasia zamiena spartyŭnym składu biełaruskich kamand. Jašče častku padobnych zbudavańniaŭ treba «addać nasielnictvu, kab baćki prychodzili tudy razam z małymi», skazaŭ jon.
Łukašenka ličyć, što ŭ pytańni vykarystańnia spartplacovak vielmi nieabchodna vypracavać sistemu, farmavać pad ich dziciačyja i darosłyja kamandy i «całkam zaniać hetyja placoŭki». «Što, «Santa-Bremar» u Breście nie padtrymaŭ by kamandu, što jamu varta dva miljony dastać z kišeni i padtrymać kamandu? Ničoha nie varta. Heta pałova biudžeta kamandy na hod, — skazaŭ jon.
«My ničoha lišniaha nie pabudavali, heta budzie zadziejničana, zaŭsiody akupicca. Heta inviestycyi ŭ čałaviečy kapitał, tamu što nie moža jaho być biez zdaroŭja», — padsumavaŭ Łukašenka.
