Nieŭzabavie ŭ Biełarusi zapracuje novy cyrk-šapito byłoha hałoŭnaha režysiora «Biełdziaržcyrka» Sierža Bandarčuka.
Aleks Hiertnier i jaho syn Džozef. Aleks i jaho brat Kryścijan — cyrkačy ŭ piatym pakaleńni. U Biełaruś jany pryjechali ź indyjskimi słanami Łakšmi, Tyčam i Bejbi.
Letaś maci Sierža i dyrektar «Biełdziaržcyrka» Taćciana Bandarčuk była zvolenaja z pasady praz karupcyjny skandał. Sierž taksama pakinuŭ dziaržaŭny cyrk i stvaryŭ svoj atrakcyjon ź biełaruskaj nazvaj «Dziva». Ciapier cyrk mieścicca na terytoryi parku «Drymłend» la skryžavańnia vulicy Arłoŭskaj i praśpiekta Pieramožcaŭ — zusim pobač z Drazdami.
«U nas budzie mižnarodnaja prahrama z trynaccaci numaroŭ.
Hledačy zmohuć pabačyć italjanskaha zaklinalnika źmiejaŭ Bruna Medžyałara. Jon, darečy, prezientuje i šou pavukoŭ-miasajedaŭ. Ja, choć i pracuju ŭ cyrku stolki hadoŭ, nikoli nie bačyŭ ničoha padobnaha.
Taksama ŭ nas budzie vystupać siamja Hierera ź Ispanii: kłoŭn Marka i jaho dzieci Mišel i Žaklin. Razam jany buduć pakazvać akrabatyčnyja numary. Trya Šaŭčenkaŭ ź Biełarusi budzie pracavać u vielmi składanym i niebiaśpiečnym žanry «ruskaja pałka». Jašče adna fiška našaha cyrka — kubinski balet. Ja budu pracavać z poni.
Adnak hvazdom prahramy stanie atrakcyjon z tryma słanami bratoŭ Hiertnieraŭ z Hiermanii», — raskazaŭ Bandarčuk.
Sierž kaža, što byli i prablemy: «Treba stolki ŭsiaho ŭzhadnić, zrabić rehistracyju dla zamiežnych artystaŭ… Voś, naprykład, kubinki havorać tolki pa-ispansku — treba vyrašać pytańnie kamunikacyi. Adnak my zmahajemsia. My ž biełarusy, my ŭsio možam».
Cyrk daść svoj pieršy vystup 7 maja. Da 16 červienia «Dziva» možna naviedać u Minsku.
Paśla hetaha jon budzie hastralavać pa rehijonach: u Mahilovie, Oršy, Navapołacku, Hrodnie, Breście. Kvitki na pradstaŭleńnie kaštujuć ad 80 da 210 tysiač.
