25 krasavika ŭ Minsku adbyłasia prezientacyja abraza «Uźniasieńnie Chrystova — Pakrovy Baharodzicy», adnoŭlenaha Muziejem staražytnabiełaruskaj kultury (MSK) Nacyjanalnaj akademii navuk Biełarusi pry hienieralnaj padtrymcy «Banka BiełVEB».
Dyrektar MSK Barys Łazuka raspavioŭ: «Hety abraz pastupiŭ u muziej u 80-ja hady z zakrytaj Pakroŭskaj carkvy vioski Chabovičy Kobrynskaha rajona. Pieršyja ž abśledavańni pakazali, što pad vierchnim słojem znachodzicca bolš staražytny słoj. Abraz čakaŭ svajoj hadziny amal try dziesiacihodździ. Ź`iavilisia novyja viedy ŭ halinie restaŭracyi, novyja mastactvaznaŭčyja padychody, kali my zmahli pačać hetuju ŭnikalnuju apieracyju — rassłajeńnia i restaŭracyi žyvapisu. Kali źniali vierchni žyvapisny słoj, jon byŭ, pa sutnaści, taŭščynioj ź plonku. Jaje treba było zachavać, a tamu my vykarystoŭvali ćviorduju prazrystuju asnovu, kab možna było ŭbačyć i advarotny bok, na jaki pierajšli niekatoryja malunki nižniaha słoju. Unikalnaść hetaj apieracyi jašče i ŭ tym, što nam upieršyniu ŭdałosia ŭbačyć padrychtoŭčuju pracu mastaka — malunak, ź jakoha jon pačynaŭ svaju pracu, pieršyja štrychi, jakija nikoli jašče nie paŭstavali pierad vačami hledačoŭ».
Pavodle słoŭ Łazuki, upieršyniu ŭ restaŭracyjnaj praktycy Biełarusi ažyćcioŭlena rassłajeńnie tvoru stankavaha žyvapisu i pieraniasieńnie źniataha słoju na novuju asnovu. «Takim čynam udałosia adkryć žyvapis XVII stahodździa i zachavać žyvapis XVIII stahodździa, — adznačyŭ mastactvaznaŭca, — viarnuć u našu rečaisnaść dva abrazy, dva novyja siužety — Pakrovy Baharodzicy i Uźniasieńnie Chrystova. Praca kalektyvu restaŭrataraŭ zaniała bolš za hod, padčas jaje my znachodzili novy vopyt i novuju płanku ŭ restaŭracyjnaj i mastactvaznaŭčaj navucy».
Ajciec Ihar, jaki vystupiŭ na prezientacyi, padkreśliŭ važnaść padziei: «Bo abraz — heta, pa-pieršaje, pomnik našaha duchoŭnaha žyćcia, pa-druhoje, pomnik kultury naroda, pa-treciaje, pomnik historyi Biełarusi».
