U Adesie milicyja na patrabavańnie prarasijskich demanstrantaŭ vypuściła zatrymanych 2 maja za masavyja biesparadki.
Paŭtarajecca daniecki scenar. Spačatku nievialičkuju hrupu šturmavikoŭ zabiaśpiečvajuć zbrojaj. Hetaja hrupa idzie na radykalnyja dziejańni. Milicyja nie stralaje, bo starajecca abyścisia biez kryvi. Stralać nie chočuć nizy — jany nie zvykłyja stralać u narod. I viarchi — bo Rasija pahražaje pakarać Ukrainu pa poŭnaj, kali pralijecca kroŭ «ruskamoŭnaha nasielnictva». Pad hetym pratektaratam Rasii radykały dyktujuć svaje ŭmovy.
Spačatku jany dabivajucca vyzvaleńnia zatrymanych, jakich, pa trapnym vyrazie Alaksandra Łukašenki, pravilna razhladać jak dyviersantaŭ. Milicyja dyviersantaŭ vypuskaje – bo Kijeŭ usio adno ničoha nie zrobić, a tut možna i paciarpieć u sutyčcy. A kali adnojčy ich vypuścili – bajevikam ciapier i Čornaje mora pa kaleno. Jany palać nacyjanalnyja ściahi. Jany šturmujuć upraŭleńni milicyi, dzie zbroja. Paśla hetaha Rasija pierapraŭlaj tudy choć sotni aŭtamataŭ, choć PZRK, choć rakiety «Satana» — maŭlaŭ, heta va ŭpraŭleńni SBU zachoplena.
Sa zbrojaj zasyłajucca vyškalenyja bajcy, jakija składajuć jadro bajavych atradaŭ.
I raspalvajuć, raspalvajuć nianaviść z teleekranaŭ i ŭ internecie.
Prarasijskija demanstranty ŭ Daniecku palać ukrainski ściah. Fota Rojterz, 4 maja.
Tak Ukrainu viaduć abo da hramadzianskaj vajny, abo da źniknieńnia jak dziaržavy. A śledam za Ukrainaj kaho jašče? Jak u toj pieśni — «Vižu rieki i pola – eto russkoje razdolje, eto rodina moja…». Śpis kandydataŭ na «ŭźjadnańnie» vialiki.
Abama, Mierkiel — i navat Bžazinski — naiŭna spadziavalisia, što źvier zadavolicca Krymam. Paśla — što ŭmiašańnie abmiažujecca Danbasam.
Usio, što rabiŭ Zachad, było too little and too late, zamała i zapozna. A Biełaruś – samaja zacikaŭlenaja — ŭvohule abmiežavałasia paraj niaśmiełych vykazvańniaŭ. Ale tyražuje ŭsiu rasijskuju prapahandu.
Situacyju moža ŭratavać chiba ŭkrainski Kromvel, ukrainski Piłsudski, jaki pačnie dziejničać pa zakonach vajennaha času.
Nie padobna, kab Parašenka moh takim stać.
Kali ŭ Krymie ruskich było 58%, u Danbasie — 39%, to ŭ Adesie ich tolki 24%. Scenar adździaleńnia tak zvanaj «Navarosii», heta značyć poŭdnia Ukrainy — heta vianiec novaj fiłasofii rasijskaj palityčnaj elity. Ciapier dzie ruskaja mova — tam i Rasija. Dzie žyvie ruskaja mienšaść — tam i Rasija. Jakaja terytoryja była ŭ Rasijskaj impieryi adnojčy, tam Rasija maje prava viarnucca.
Ukrainski mitynh u Adesie 4 maja. Fota Rojterz.
Bolšaść ukraincaŭ na ŭschodzie, u Adesie zamiorli. Jak i milicyjanty. Bo nie bačać šancaŭ na pieramohu, kali pre takaja armada, kali ŭzialisia za nažy. Jany siamiejnaj pamiaćciu zanadta dobra pamiatajuć 1919-y, achviarnuju śmierć studentaŭ pad Krutami, a paśla — Haładamor, 1937-y i Babin Jar. Nacyi Uschodniaj Jeŭropy pryvykli, što ŭ takich situacyjach treba staicca i pieračakać, što heta adziny šaniec.
Tolki palaki zdoleli zrabić «cud na Viśle», voś jany i hladziać na śviet inakš paśla hetaha.
Rasijskija ŚMI siońnia strašna čytać, strašna słuchać. Jany padbuchtorvajuć ukraincaŭ da stralańnia ŭ svaich suajčyńnikaŭ. Idzie prapahanda nianaviści. «Zabi pravy siektar!» A chto taki pravy siektar? A toj, chto havoryć pa-ŭkrainsku, chto choča, kab Ukrajina była niezaležnaj. Skrynka Pandory adkryta.
Dzie spynicca hetaja revanšysckaja chvala? Chto jaje spynić?
Jany chočuć pastavić na kaleni Ukrainu, jakaja mieła dziorzkaść ad ich adździalicca.
Jak tut nie pryhadać mistyčny vypadak u Rymie, kali krumkač zabiŭ hałubku, jakuju Papa vypuściŭ u znak malitvy za mir va Ukrainie.
Kryvavyja padziei ŭ Adesie 2 maja — heta kropla ŭ toj chvali kryvi, jakim peŭnyja palityčnyja dziejačy hatovy — i navat chacieli b — zalić Uschodniuju i Centralnuju Jeŭropu i Kaŭkaz. Pieradzieł miežaŭ — heta cunami kryvi.
Tolki cud na Dniapry moža zaraz spynić hetaje cunami.
