Samyja zahružanyja vulicy Minska raźmieščanyja ŭ centry, a bolš svabodna na vulicy Cimirazieva. Ab hetym paviedamili ŭ pres-słužbie rasijskaj internet-kampanii «Jandeks», spasyłajučysia na źviestki servisu «Jandeks.Probki», jaki aceńvaje darožnyja zatory pa 10-balnaj škale.
Bolš za ŭsio ad darožnych zatoraŭ ciarpić centr horada: vulicy Lenina, Niamiha, a taksama skryžavańnie hetych vulic z praśpiektami Niezaležnaści i Pieramožcaŭ. Kali b zahružanaść horada ŭ «Jandeks.Probkach» raźličvałasia tolki na asnovie źviestak ab centry Minska, to ŭ 9 hadzin ranicy zahružanaść skłała b užo 7 bałaŭ, zatym źnižałasia b da 4 bałaŭ u siaredzinie dnia, a ŭ 18.20 dasiahała b maksimumu ŭ 10 bałaŭ — u hety čas praktyčna ŭsie značnyja aŭtadarohi centralnaj častki horada stajać miortva.
Analityki «Jandeks.Probak» taksama vyvučyli ŭsie najbujniejšyja radyjalnyja vulicy, jakija spałučajuć MKAD i ŭnutranaje aŭtakoła. Na radyjalnych mahistralach ranišniaja i viačerniaja hadziny pik mała adroźnivajucca, chacia viečaram aŭtamabilaŭ na darohach Minska zvyčajna bolš. Što cikava, ranicaj i viečaram u horadzie možna trapić u probku adrazu ŭ abodvuch napramkach. Heta adroźnivaje Minsk ad inšych bujnych haradoŭ. Naprykład, dla Maskvy charakternyja «majatnikavyja probki»: ranicaj usie z uskrainy horada jeduć u centr, a viečaram naadvarot.
Na radyjalnych mahistralach Minska bolš za ŭsio šansaŭ trapić u probku, kali ruchacca pa Łahojskim trakcie i vulicy Jakuba Kołasa. Pryčym u bok centra na hetym učastku probki adnolkavyja i ranicaj, i viečaram — pa 6 bałaŭ. A voś u bok vobłaści ranišnija zatory sastupajuć viačernim — adpaviedna 4 i 6 bałaŭ.
Pavodle źviestak servisu «Jandeks.Probki», na druhim miescy pa zahružanaści — Dałhinaŭski trakt, asabliva kali jechać u bok centra. Praktyčna ŭvieś dzień abciažarany ruch pierad skryžavańniem z Arłoŭskaj vulicaj, a pad viečar situacyja tolki abvastrajecca. Pa hetaj pryčynie zahružanaść tut składaje minimum 5 bałaŭ.
Trapić u probku možna taksama na Ihumienskim trakcie i na vulicy Majakoŭskaha ŭ bok vobłaści — heta treciaja pa zahružanaści radyjalnaja mahistral Minska. Ranicaj zatory tut składajuć 3 bały, viečaram — 4. Zamykajuć śpis samych zahružanych napramkaŭ vulicy Šaranhoviča i Panamarenki, dzie z ranicy časam uźnikajuć 5-balnyja probki ŭ bok centra.
Astatnija trasy Minska mienš ciarpiać ad darožnych zatoraŭ. Tak, na praśpiekcie Niezaležnaści probki ŭ bok centra dasiahajuć u viačerniuju hadzinu pik 5 bałaŭ, adnak praktyčna nie adčuvajucca na praciahu ŭsiaho dnia. A bolš svabodna ŭ biełaruskaj stalicy na vulicy Cimirazieva i na praśpiekcie Pieramožcaŭ pamiž MKAD i ŭnutranym kołam, dzie praktyčna nikoli nie byvaje zatoraŭ.
Daśledavańnie samych zahružanych vulic Minska pravodziłasia «Jandeksam» na asnovie źviestak ab probkach u sakaviku 2014 hoda.
