25 maja — asnoŭny dzień hałasavańnia na vybarach u Jeŭrapiejski parłamient.
Žycharam krain Jeŭrasajuza treba vybrać 751 parłamientaryja na najbližejšyja piać hadoŭ. Vybary doŭžacca ŭžo niekalki dzion. 22 maja prahałasavali hramadzianie Vialikabrytanii i Niderłandaŭ, 23-ha — Čechii i Irłandyi, 24-ha — Italii, Litvy, Słavakii i Malty. Siońnia hałasavańnie prachodzić u astatnich 20 krainach Jeŭrasajuza.
Miescy ŭ parłamiencie ES raźmiarkoŭvajucca ŭ zaležnaści ad kolkaści nasielnictva toj ci inšaj krainy. Bolš za ŭsio mandataŭ — 96 — u Hiermanii, u toj čas jak Estonija, Luksiemburh, Malta i Kipr pavinny vybrać tolki pa šeść deputataŭ. Łozunh vybarčaj kampanii: «Hetym razam usio budzie pa-inšamu!» Jaje asablivaść u tym, što vynik vybaraŭ naŭprost paŭpłyvaje na vybrańnie ŭ lipieni novaha staršyni Jeŭrakamisii — orhana kiravańnia ES. Kandydat na hetuju pasadu, vyłučany partyjnym ab`iadnańniem u Jeŭraparłamiencie, pavinien budzie atrymać uchvału bolšaści deputataŭ novaha Jeŭraparłamienta. Najbolš vierahodnymi pretendentami na pasadu kiraŭnika Jeŭrakamisii ličacca Žan-Kłod Junkier (kandydat ad kansiervataraŭ) i sacyjał-demakrat Marcin Šulc.
Pavodle prahnozaŭ mnohich ekśpiertaŭ, na hetych vybarach bolšaść žycharoŭ Jeŭrasajuza addaduć svaje hałasy za hetak zvanych jeŭraskieptykaŭ — pradstaŭnikoŭ krajnie pravych i levych partyj. U Niderłandach paśla zakryćcia vybarčych učastkaŭ byli apublikavanyja vyniki eksit-połaŭ, zhodna ź jakimi najbolšuju kolkaść hałasoŭ vybarščykaŭ atrymali levalibieralnaja partyja «Demakraty 66» i chryścijanska-demakratyčnaja partyja «Chryścijanska-demakratyčny zaklik» (u abiedźviuch partyj pryblizna 15% hałasoŭ). A jeŭraskieptyčnaja «Partyja svabody» dzielić treciaje miesca z praviačaj pravalibieralnaj «Narodnaj partyjaj za svabodu i demakratyju» (mienš za 13%).
Vyniki vybaraŭ u Jeŭraparłamient buduć ab`iaŭleny adnačasova ŭ noč z 25 na 26 maja.
Jeŭraparłamient — zakanadaŭčy, pradstaŭničy orhan Jeŭrapiejskaha sajuza. U jaho paŭnamoctvy ŭvachodzić pryniaćcie zakonaŭ i biudžetu ES, a taksama kantrol za pracaj Jeŭrakamisii.
