Siońnia ranicaj, u 7:30, pamior paet Hienadź Buraŭkin. Apošnija miesiacy jon zmahaŭsia z ankałahičnym zachvorvańniem. Hienadziu Mikałajeviču było 77 hadoŭ. Jon pamior u svajoj kvatery.
Pra miesca raźvitańnia i pachavańnie budzie viadoma paźniej, paviedamiła «NN» kiraŭnik ZBS «Baćkaŭščyna» Alena Makoŭskaja.
***
Hienadź Buraŭkin: «Usie viedali, što ja «kadr» Piatra Mašerava»
***
Hienadź Buraŭkin naradziŭsia 28 žniŭnia 1936 hoda ŭ vioscy Šulacina Rasonskaha rajona.
Skončyŭ adździaleńnie žurnalistyki fiłfaka BDU (1959). Pracavaŭ u časopisie «Kamunist Biełarusi», u haziecie «Litaratura i Mastactva», byŭ karespandentam «Pravdy» pa Biełarusi, hałoŭnym redaktaram časopisa «Maładość», dzie drukavaŭ tvory Vasila Bykava i Uładzimira Karatkieviča, a taksama knihu Alesia Adamoviča, Janki Bryla i Uładzimira Kaleśnika «Ja z vohniennaj vioski».
Źjaŭlaŭsia staršynioj Dziaržteleradyjo BSSR (1978—1990), adnak za padtrymku demakratyčnych sił i pradstaŭleńnie efiru lidaram BNF byŭ vyzvaleny ad pasady i nakiravany na dypłamatyčnuju pracu.
U 1990 atrymaŭ pryznačeńnie pastajannaha pradstaŭnika Respubliki Biełaruś pry AAN, mocna paspryjaŭ zbližeńniu biełaruskaj emihracyi i mietrapolii.
U 1993 h. źviarnuŭsia da staršyni VS Respubliki Biełaruś z prośbaj ab vyzvaleńni ad hetaj pasady. Paśla viartańnia, u 1994—1995, byŭ namieśnikam ministra kultury i druku.
Pieršyja svaje vieršy jon nadrukavaŭ u połackaj abłasnoj haziecie ŭ 1952. Paźniej vyjšli jaho knihi «Majskaja prosiń» (1960), «Ź luboŭju i nianaviściu ziamnoju» (1963), «Dychańnie» (1966), «Žnivo» (1971), «Vytok» (1974), «Varta viernaści» (1978), «Hniazdo dla ptuški radaści» (1986). Aŭtar zbornikaŭ paezii «Uzmach kryła» (1995), «Pamiž zorkaj i śviečkaj» (2000), kniha «Vybranaje» (1998).
Hienadź Mikałajevič — aŭtar mnohich knih paezii, pieśni na słovy jahonych vieršaŭ śpiavaje nie adno pakaleńnie biełarusaŭ, a pad «Kałychanku» Buraŭkina maleńkija biełarusy zasynajuć užo bolš za dvaccać hadoŭ
