Na praciahu bližejšych 10-14 dzion «Bank VTB» (Rasija) vydzielić Biełarusi kredyt na adzin miljard dołaraŭ ZŠA. Pra heta paviedamiŭ žurnalistam 30 maja ŭ Minsku pradstaŭnik Biełarusi ŭ Jeŭrazijskaj ekanamičnaj kamisii, staršynia praŭleńnia Banka raźvićcia Biełarusi Siarhiej Rumas.
«Dasiahnutaja damoŭlenaść z «VTB» ab pradastaŭleńni brydž-kredytu na sumu $1 młrd. Srodki buduć pieraličanyja na praciahu bližejšych 10-14 dzion», — skazaŭ Rumas, udakładniŭšy, što srodki buduć zaličanyja ŭ skład zołatavalutnych reziervaŭ Biełarusi.
Jon taksama paviedamiŭ, što kredyt, pradstaŭleny Biełarusi Bankam VTB (Rasija) ŭ śniežni 2013 hoda na sumu $450 młn, budzie prałanhiravany da vieraśnia 2014 hoda.
«My čakajem, što za hety čas (da vieraśnia) zavieršacca ŭsie nieabchodnyja pracedury dla vydzialeńnia Rasijaj miždziaržaŭnaha kredytu na dva miljardy, za košt jakich brydž-kredyty buduć pahašanyja», — paviedamiŭ Siarhiej Rumas.
Pry hetym jon udakładniŭ, što dakładnyja terminy vydzialeńnia dvuchmiljardnaha kredytu pakul nieviadomyja.
«Terminy zaležać nie ad nas, a ad Rasii. Im treba prajści nieabchodnyja pracedury, źviazanyja z razhladam hetych pytańniaŭ u dumie», — skazaŭ Siarhiej Rumas.
Jak paviedamlałasia raniej, Alaksandr Łukašenka paśla majskaj sustrečy z prezidentam Rasii Uładzimiram Pucinym paviedamiŭ, što Rasija pradastavić Biełarusi kredyt na $2 młrd. Biełaruskija ŭłady pryciahvajuć rasiejski kredyt na papaŭnieńnie zołatavalutnych reziervaŭ, jakija z pačatku hoda źnizilisia amal na 20%.
