U piatnicu stała viadoma, što ŭ vyklučnaj ekanamičnaj zonie Litvy ŭ Bałtyjskim mory znachodziacca vajennyja karabli Rasiei.
Pamiž 9 i 10 hadzinami ŭ piatnicu VMS Litvy atrymali paviedamleńnie ab tym, što z-za rasijskich marskich vučeńniaŭ musiać mianiać kurs cyvilnyja karabli, jakija znachodziacca ŭ vyklučnaj ekanamičnaj zonie Litvy. Siarod apošnich było i sudna, jakoje vykonvaje raboty pa prakładcy padvodnaha kabiela dla elektraenierhietyčnaha złučeńnia pamiž Litvoj i Šviecyjaj.
Na heta adreahavaŭ karabiel M52 Suduvis VMS Litvy, jaki vyjšaŭ u mora, tudy ž byŭ nakiravany viertalot Mi-8 VPS Litvy.
U vyklučnaj ekanamičnaj zonie Litvy byli identyfikavanyja try karabli Bałtyjskaha fłotu VMF Rasii, paviedamiła Minabarony Litvy.
Dva z hetych karabloŭ adnosiacca da adnaho z samych sučasnych kłasaŭ karvietaŭ. Ich pryznačeńnie — baraćba z celami pad vadoj, nad vadoj, na sušy i ŭ pavietry, a taksama padtrymka desantnych apieracyj pry vysadcy desantu na bierah, źniščeńnie celaŭ na adlehłaści prykładna 150 km. Hetyja karabli abstalavanyja sučasnymi technałohijami Stealth, jakija ŭskładniajuć vyjaŭleńnie karabla.
Treci rasijski karabiel — sučasny rakietny krejsier.
Heta ŭžo druhi padobny incydent na hetym tydni i treci ŭ hetym hodzie, kali z-za vajennych vučeńniaŭ RF čyniacca pieraškody cyvilnamu sudnachodstvu ŭ vyklučnaj ekanamičnaj zonie Litvy.
