Šasnaccaty pa liku, spravazdačna-vybarny źjezd Abjadnanaj hramadzianskaj partyi (AHP) pačaŭ pracavać u Minsku. U mierapryjemstvie biaruć udzieł bolš jak 100 delehataŭ z abłaściej i Minska.
Fota ucpb.org
Budzie abrana novaje kiraŭnictva partyi, razhledžany płany dziejnaści na najbližejšyja hady.
Płanujecca vyznačycca z pretendentam ad partyi, jaki moža ŭziać udzieł u prezidenckich vybarach 2015 hoda ŭ jakaści kandydata.
Z metaj vyznačeńnia takoha pretendenta padčas padrychtoŭki da źjezda na rehijanalnych kanfierencyjach AHP arhanizavała ŭnutrypartyjnyja prajmieryz. Śpisy dla hałasavańnia byli adkrytymi, usiaho ŭ ich byli ŭklučany 33 proźviščy. Pa vynikach hałasavańnia najbolšuju kolkaść hałasoŭ nabrali Alaksandr Dabravolski (kiraŭnik ekśpiertnaj kamisii), Anatol Labiedźka i Vasil Palakoŭ (namieśnik staršyni).
Abrany na źjeździe pradstaŭnik AHP, jak rastłumačyŭ lidar partyi Anatol Labiedźka, «budzie brać udzieł u jakaści pretendenta ŭ pracedury vybaraŭ adzinaha kandydata ŭ prezidenty ad demakratyčnych sił abo, kali damoŭlenaści pa pracedury dasiahnutyja nie buduć, — u jakaści kandydata ŭ prezidenty ad AHP».
Labiedźka ličyć, što ŭ 2015 hodzie budzie «samaja ciažkaja kampanija».
Pa-pieršaje, adznačyŭ jon, u ludziej nazapasiłasia šmat rasčaravańnia i stomlenaści. Pa-druhoje, Alaksandr Łukašenka «atrymaŭ mocnuju padtrymku Kramla». Pa-treciaje, nie vyklučaje palityk, «Zachad moža paŭtaryć pamyłku, vydaŭšy Łukašenku kredyty».
U toj ža čas, padkreśliŭ Labiedźka, AHP moža «prezientavać pazityŭnuju alternatyvu».
«U nas jość antykryzisnaja prahrama, abmiarkoŭvać jakuju zaprašaŭ Stanisłava Bahdankieviča na furšet Michaił Miaśnikovič», — paviedamiŭ jon.
Zaznačym, što AHP da apošniaha ŭtojvała miesca praviadzieńnia źjezda, apasajučysia pravakacyj. Reč u tym, što partyja atrymlivała admovy na prośby ŭ arendzie pamiaškańniaŭ, jakija tradycyjna vykarystoŭvalisia dla praviadzieńnia źjezdaŭ palityčnych partyj. U vyniku źjezd prachodzić u kanfierenc-zale adnaho sa staličnych hatelaŭ.
Hł. taksama:
Staršynioj AHP na čarhovy termin pieraabrany Anatol Labiedźka, atrymaŭšy 80% hałasoŭ
