Čatyrochdzionny samit, pryśviečany seksualnamu hvałtu ŭ chodzie vajennych kanfliktaŭ, adkryŭsia ŭ Łondanie. Arhanizatarami hetaha biesprecedentnaha pa maštabach forumu vystupili kiraŭnik brytanskaha MZS Uiljam Chiejh i aktrysa Andžalina Džoli, jakaja źjaŭlajecca pasłom dobraj voli AAN.
Kanfierencyja stała zaviaršeńniem kampanii, što doŭžyłasia dva hady, metaj jakoj było pryciahnuć uvahu da hetaj prablemy.
Chiejh zaklikaŭ pradstaŭnikoŭ 140 krain, jakija prymajuć udzieł u forumie, uvieści miery suprać sieksualnaha hvałtu ŭžo na etapie armiejskaj padrychtoŭki. Jon nazvaŭ zhvałtavańnie adnym z «žudasnych masavych złačynstvaŭ» sučasnaści.
Łondanski samit — najbujniejšaja ŭ śviecie kanfierencyja na temu seksualnaha hvałtu ŭ zonach kanfliktu.
U pracy forumu ŭdzielničajuć pradstaŭniki ministerstvaŭ zamiežnych spraŭ, vajennych viedamstvaŭ, pravaachoŭnych orhanaŭ i niaŭradavych arhanizacyj z usiaho śvietu.
Arhanizatary samitu spadziajucca, što suśvietnaja supolnaść ŭśviedamlaje, što seksualny hvałt nie pavinien rabicca niepaźbiežnaj častkaj uzbrojenych kanfliktaŭ.
Z taho času, jak Uiljam Chiejh i Andžalina Džoli zapuścili svaju kampaniju dva hady tamu, pradstaŭniki 141 krainy padpisali dekłaracyju ab abaviazacielstvie pakončyć z seksualnym hvałtam u chodzie kanfliktaŭ.
Adnak hałoŭnaja meta ciapier — zrabić kankretnyja kroki dla vyrašeńnia hetaj prablemy. Siarod ich — palapšeńnie sistemy dakumientacyi seksualnaha hvałtu i akazańnie bolš efiektyŭnaj dapamohi paciarpiełym ad jaho.
Jak paviedamiŭ Uiljam Chiejh, u pracy samitu biaruć udzieł pradstaŭniki Bośnii, Demakratyčnaj respubliki Konha i Samali — krain, jakija sutyknulisia z seksualnym hvałtam u «vializnym maštabie».
Raniej jon zajaŭlaŭ, što pryjšoŭ čas nazaŭsiody prybrać seksualny hvałt z «suśvietnaha arsienału žorstkaści».
Pavodle jaho słoŭ, hetaja tema časta ihnarujecca ŭ kancy vojnaŭ. Naprykład, u chodzie kanfliktu ŭ Bośnii ŭ 1990-ch hadach kala 50 tysiač žančyn padvierhlisia hvałtu, adnak praktyčna nichto ź ich nie zmoh damahčysia spraviadlivaj kary.
«Na hetym tydni my pastarajemsia raspracavać mižnarodny pratakoł, jaki akreślivaje standarty dla dakumientavańnia i rasśledavańnia hetych złačynstvaŭ, kab ludzi viedali, što ŭ šmatlikich vypadkach spraviadlivaść pieramoža i što takija złačynstvy nie mohuć ździajśniacca biespakarana», — kaža Chiejh.
