Nacyjanalny histaryčny archiŭ Biełarusi sioleta padrychtavaŭ treci tom zbornika «Hierboŭnik biełaruskaj šlachty» ź sieryi, jakaja vychodzić z 2002 hoda, paviedamiŭ na pres-kanfierencyi 30 vieraśnia ŭ Minsku dyrektar archiva Dźmitryj Jacevič.
«Heta praca maładych daśledčykaŭ našaha archiva, — adznačyŭ jon. — U trecim tomie padadziena 249 radavodaŭ šlachty Minščyny. Dla daśledčykaŭ, jakija vyvučajuć hetaje pytańnie, heta nieacennaja dapamoha, nadzvyčaj cikavaja, u tym liku dla vyvučeńnia histaryčnych pracesaŭ, što adbyvalisia ŭ Biełarusi».
Akramia taho, sioleta histaryčny archiŭ Biełarusi vypuścić daviednik «Dziaržaŭnyja, relihijnyja i hramadskija ŭstanovy 1772—1917 hadoŭ», jaki tyčycca Mahiloŭskaj hubierni Rasijskaj impieryi.
«Daviednik prapanuje historyju i strukturu ŭsich dziaržaŭnych ustanoŭ, što byli stvoranyja na terytoryi Mahiloŭskaj hubierni, jakaja ŭ tyja časy ŭklučała ciapierašnija ziemli Mahiloŭskaj, Homielskaj i častkova Viciebskaj abłaściej, — skazaŭ dyrektar archiva. — Hety zbornik budzie karysny ŭsim, chto cikavicca historyjaj svaich ustanoŭ, i tym, chto stajaŭ kala vytokaŭ ich stvareńnia. Faktyčna heta encykłapiedyčny daviednik, jaki ŭtrymlivaje źviestki ab mnohich arhanizacyjach, jakija isnujuć i ciapier, naprykład ab papiarovaj fabrycy ŭ Dobrušy».
Prezientacyja abodvuch vydańniaŭ adbudziecca najbližejšym časam.
Jacevič adznačyŭ, što sioleta Nacyjanalny histaryčny archiŭ vypuściŭ čarhovy tom navukovaha štohodnika «Archivaryus», jaki «ŭvachodzić u pieralik vydańniaŭ, rekamiendavanych dla padrychtoŭki publikacyj pierad abaronaj doktarskich dysiertacyj».
Akramia taho, siłami biełaruskich archivistaŭ padrychtavany zbornik dakumientaŭ «Paŭstańnie 1863—1864 hadoŭ u Viciebskaj, Mahiloŭskaj i Minskaj hubierniach», prezientacyja jakoha adbyłasia ŭ krasaviku. «Heta surjoznaja praca, našy rabotniki niekalki hadoŭ šukali cikavyja dakumienty, źviazanyja z hetaj padziejaj. Vydańnie vyklikała vialikuju cikavaść, bo 2014 hod adnosna hetaj padziei — jubilejny. U zborniku ŭtrymlivajecca bolš za dźvieście dakumientaŭ, što raniej nie publikavalisia i nie byli ŭviedzienyja ŭ navukovy abarot», — adznačyŭ dyrektar archiva.
Jašče adnoj padziejaj hoda stała kniha «Biełaruś u hady Pieršaj suśvietnaj vajny». Hetaje vydańnie, u asnovu jakoha lahli zvyš 200 archiŭnych dakumientaŭ, užo atrymała mnostva stanoŭčych vodhukaŭ navukovaj hramadskaści jak u Biełarusi, tak i za miažoj.
«Sioleta my pierasiahnuli sami siabie i vyjšli na dobry suśvietny ŭzrovień nie pa kolkaści, a pa jakaści vydańniaŭ», — padsumavaŭ Jacevič.
