Minsielhascharč Biełarusi prapracoŭvaje mahčymaść zaklučeńnia doŭhaterminovych dahavoraŭ na pastaŭku bulby ŭ Kareliju, Vołahdu i Murmansk.
Ab hetym paviedamiła načalnik adździeła pa vytvorčaści płodaaharodninnaj pradukcyi Ministerstva sielskaj haspadarki i charčavańnia Taćciana Karbanovič.
«U asnoŭnym my ekspartujem bulbu pa doŭhaterminovych dahavorach, jakija zaklučany pamiž respublikanskaj asacyjacyjaj «Bulbapłodaaharodnina» i takimi rehijonami susiedniaj krainy, jak Leninhradskaja, Kalininhradskaja, Maskoŭskaja vobłaści. Našu bulbu chacieli b bačyć na svaich rynkach i bolš paŭnočnyja rehijony Rasii, naprykład, Murmanskaja i Vałahodskaja vobłaści, Karelija. Ź imi my ciapier prapracoŭvajem novyja doŭhaterminovyja dahavory», — adznačyła pradstaŭnik Minsielhascharča.
U biahučym hodzie ŭžo ekspartavana kala 40 tys. t bulby novaha ŭradžaju, što składaje 102 pracenty da vieraśnia 2013 hoda. Praktyčna ŭsie pastaŭki bulby prypadajuć na blizkija rehijony Rasii.
Ciapier bulba ŭ Biełarusi ŭbrana na 35 tys. ha, abo 76 pracentach adviedzienych pad hetu kulturu płoščaŭ. Tempy ŭborki składajuć 140 pracentaŭ da ŭzroŭniu minułaha hoda. Usiaho płanujecca sabrać 1,2 młn t bulby. «My praktyčna ŭžo dasiahnuli miljonnaj miažy: u sielskahaspadarčych arhanizacyjach atrymana 868 tys. t bulby i jašče 124 tys. t — u fiermierskich haspadarkach», — paviedamiła Taciana Karbanovič. Płanujecca, što 250 tys. t bulby pojduć u nasienny fond, 179 tys. t — na prampierapracoŭku, jašče kala 71 tys. t uvojdzie ŭ stabilizacyjny fond na mižsiezonny pieryjad 2014-2015 hadoŭ.
