Były dyrektar TAA «Budinviest» abvinavačvajecca ŭ naŭmysnym stvareńni i pavieličeńni niepłaciežazdolnaści jurydyčnaj asoby, złoŭžyvańni ŭładaj ci słužbovymi paŭnamoctvami, uchileńni ad vypłaty padatkaŭ u asabliva bujnym pamiery i inšych supraćpraŭnych dziejańniach.
Kryminalnuju spravu rasśledavali ŭpraŭleńnie Śledčaha kamiteta i ŭpraŭleńnie Departamienta finansavych rasśledavańniaŭ KDK.
Jak paviedamili va USK i UDFR pa Mahiloŭskaj vobłaści, były hiendyrektar, jaki źjaŭlaŭsia taksama indyvidualnym pradprymalnikam, ažyćciaŭlaŭ svaju złačynnuju dziejnaść sa śniežnia 2010 hoda pa luty 2012 hoda.
«Z metaj naŭmysnaha stvareńnia niepłaciežazdolnaści tavarystva abvinavačvany zaklučyŭ šerah zaviedama niavyhadnych dahavoraŭ, u pryvatnaści, pa arendzie niaspraŭnaha viežavaha krana, što znachodzicca ŭ asabistaj ułasnaści, rynačny košt jakoha składaŭ 23 młn rubloŭ, z arendnaj płataj 15 młn rubloŭ štomiesiac, aformiŭšy pazykovyja abaviazacielstvy TAA «Budinviest» pierad IP, a faktyčna pierad saboj», — skazali pravaachoŭniki.
Pavodle danych śledstva, dla vykanańnia hetaha dahavora arendy TAA «Budinviest» z krasavika 2011 hoda pa luty 2012 hoda apłaciła indyvidualnamu pradprymalniku bolš za 11 młrd rubloŭ, što stała dla TAA pryčynaj admoŭnych ekanamičnych nastupstvaŭ, jakija vykazalisia ŭ nieabhruntavanym pieraliku hrašovych srodkaŭ za majomaść, niepryhodnuju da vykarystańnia ŭ haspadarčaj dziejnaści. Atrymanyja hrašovyja srodki abvinavačvany vykarystoŭvaŭ u asabistych metach.
Akramia hetaha, ad imia TAA «Budinviest» u intaresach inšych asob była ažyćcioŭlena ździełka pa prodažy abjektaŭ nieruchomaści tavarystva pa canie, jakaja amal u dva razy nižejšaja za rynačnuju.
«Abvinavačvany zaklučyŭ dahavor na vykanańnie budaŭniča-mantažnych rabot pa budaŭnictvie 80-kvaternaha žyłoha doma i atrymaŭ ad KUP «UKB Škłoŭskaha rajvykankama» metavy avans na jaho budaŭnictva ŭ sumie bolš za 2 młrd rubloŭ. Abvinavačvany vykanaŭ budaŭničyja raboty tolki na 290 młn rubloŭ», — paviedamili ŭ pravaachoŭnych viedamstvach.
Abvinavačvany spyniŭ vytvorčaść rabot, astatnija hrošy zraschodavaŭ na zakryćcio inšych abaviazacielstvaŭ TAA pa raniej zaklučanych dahavorach i ŭ svaich karyślivych metach.
Pravaachoŭniki vyśvietlili, što budaŭnictva doma było zamarožana na adzin hod. U suviazi z hetym naniesieny značny ŭron dziaržaŭnym i hramadskim intaresam.
Padčas rasśledavańnia karupcyjnaj dziejnaści hiendyrektara taksama było ŭstanoŭlena, što abvinavačvany naŭmysna admaŭlaŭsia vykonvać rašeńnie haspadarčaha suda ab spahnańni na karyść adnaho z pradpryjemstvaŭ Mahilova bolš za 20 młn rubloŭ zavinavačanaści.
«Jon ža, kali byŭ zarehistravany ŭ jakaści indyvidualnaha pradprymalnika, u parušeńnie padatkovaha zakanadaŭstva šlacham utojvańnia i naŭmysnaha prynižeńnia padatkovaj bazy, uniasieńnia ŭ padatkovyja dekłaracyi zaviedama łžyvych źviestak, uchiliŭsia ad vypłaty ŭ biudžet padatkaŭ i zboraŭ u asabliva bujnym pamiery ŭ ahulnaj sumie 1 młrd rubloŭ», — paviedamili ŭ pravaachoŭnych viedamstvach.
U dačynieńni da byłoha hiendyrektara była raspačata sprava na padstavie čatyroch artykułaŭ KK: č. 2 art. 240; č. 3 art. 424; art. 242 i č. 2 art. 243.
Abvinavačvany znachodzicca pad vartaj, kanfiskavana buchhałtarskaja i inšaja dakumientacyja. 53 tamy materyjałaŭ kryminalnaj spravy pieradadzieny ŭ prakuraturu dla nakiravańnia ŭ sud.
