U internecie pačynaje dziejničać kiryličnaja damiennaja zona «.Bieł», paviedamiŭ 9 kastryčnika na kanfierencyi «Dziełavy internet» u Minsku Siarhiej Pavališaŭ, dyrektar kampanii hoster.by (techničny administratar zony.BY, upaŭnavažany pastaŭščyk pasłuh dla dziaržorhanaŭ, najbujniejšy chostynh-pravajdar i rehistratar damiennych imionaŭ u Biełarusi).
Pavališaŭ skazaŭ, što ŭ vieraśni ad arhanizacyi ICANN byŭ atrymany dazvoł na pracu kiryličnaj damiennaj zony «.Bieł». «29 vieraśnia arhanizacyja ICANN pačała praces delehavańnia novaha damiena. Zapusk hetaj damiennaj zony adbudziecca zusim chutka», — zapeŭniŭ dyrektar kampanii hoster.by.
Paśla pieradačy kantrolu nad damienam adkaznamu boku pieršyja try miesiacy budzie dziejničać pryjarytetnaja rehistracyja damienaŭ dla ŭładalnikaŭ tavarnych znakaŭ i firmiennych najmieńniaŭ jurydyčnych asob. Košt rehistracyi na dva hady składzie 100 dołaraŭ ZŠA ŭ ekvivalencie.
Zatym na praciahu troch miesiacaŭ buduć pravodzicca dabračynnyja internet-aŭkcyjony premium-damienaŭ (košt rehistracyi damiena składzie ŭžo 30 dołaraŭ ZŠA). U vypadku adsutnaści cikavaści da damiena jon budzie addavacca pa minimalnym zajaŭlenym košcie.
I tolki praz paŭhoda z momantu startu kiryličnaj damiennaj zony «.Bieł» rehistracyja ŭ joj budzie adkrytaja dla ŭsich achvotnych biez vyklučeńnia. Pry hetym praviły buduć anałahičnyja praviłam rehistracyi ŭ dziejnaj damiennaj zonie.BY. Košt rehistracyi damiena taksama zraŭniajecca (ciapier ekvivalentny prykładna 15 dołaram ZŠA).
«Etapy rehistracyi prydumanyja nie nami — usio zroblena na asnovie suśvietnaj praktyki. Chiba što akramia dabračynnych aŭkcyjonaŭ, kali ŭtarhavanyja srodki pieraličvajucca ŭ dziciačyja damy», — adznačyŭ Pavališaŭ.
Pavodle jaho słoŭ, čakajecca, što ŭ pieršy hod pracy ŭ kiryličnaj damiennaj zonie «.Bieł» budzie zarehistravana pryblizna 20 tysiač damienaŭ.
Jak adznačyŭ dyrektar hoster.by, ź`iaŭleńnie takoj damiennaj zony — heta nie praźmiernaść, a nieabchodnaść, abumoŭlenaja časam i imklivym praniknieńniem internetu va ŭsie śfiery žyćcia. U liku pieravah jon nazvaŭ adsutnaść prablem z tranślitaracyjaj; adnaznačnaje napisańnie i prostaje ŭsprymańnie na słych; padtrymku biełaruskaj movy i kultury — rehistravać damieny možna budzie jak u ruskamoŭnym, tak i ŭ biełaruskamoŭnym napisańni.
Pavališaŭ taksama paviedamiŭ, što ŭ zonie.BY zarehistravana 110.000 damienaŭ. Čakany pryrost za hod składzie 18%, i pa tempach rostu rehistracyi damienaŭ Biełaruś pa-raniejšamu zajmaje pazicyju lidara ŭ Jeŭropie. Faktyčna ŭ zonie.BY pastajanna vykarystoŭvajecca 80% zarehistravanych damienaŭ.
Sioleta nacyjanalnaj damiennaj zonie Biełarusi spoŭniłasia 20 hadoŭ — jana była zarehistravanaja 5 maja 1994 hoda.
