Prezident Ukrainy Piatro Parašenka paprasiŭ prabačeńnia za svoj asabisty niaŭdzieł u samicie SND u Minsku i prapanavaŭ Alaksandru Łukašenku sustrecca ŭ najbližejšy čas va Ukrainie. Telefonnaja razmova lidaraŭ dźviuch dziaržaŭ adbyłasia 9 kastryčnika.
Jak paviedamlaje pres-słužba prezidenta Biełarusi, kiraŭniki dziaržaŭ abmierkavali paradak dnia samitu SND u Minsku, jaki adbudziecca 10 kastryčnika. «Prezident Ukrainy vykazaŭ prabačeńni ŭ suviazi ź niemahčymaściu asabista prybyć na pasiadžeńnie Savieta kiraŭnikoŭ dziaržaŭ SND i pierakanaŭča paprasiŭ prezidenta Biełarusi jak staršyniu Sadružnaści davieści pazicyju Ukrainy da astatnich udzielnikaŭ sustrečy. Intaresy Ukrainy na samicie budzie pradstaŭlać pasoł hetaj krainy ŭ Biełarusi», — havorycca ŭ paviedamleńni.
Prezident Ukrainy taksama paprasiŭ davieści da ŭdzielnikaŭ pazicyju Ukrainy ŭ suviazi z padziejami ŭ Łuhanskaj i Danieckaj abłaściach.
«Piatro Parašenka prainfarmavaŭ prezidenta Biełarusi ab płanavanaj sustrečy z prezidentam Rasijskaj Fiederacyi Uładzimiram Pucinym, jakaja pavinna adbycca ŭ najbližejšy čas. Pavodle infarmacyi Piatra Parašenki, u chodzie hetaj sustrečy budzie abmierkavany ŭvieś kompleks pytańniaŭ ukrainska-rasijskaha paradku dnia, uklučajučy spynieńnie ŭzbrojenaha supraćstajańnia na paŭdniovym uschodzie Ukrainy», — paviedamlaje pres-słužba biełaruskaha kiraŭnika.
Prezidenty Biełarusi i Ukrainy taksama abmierkavali prablematyku dvuchbakovaha supracoŭnictva. Piotr Parašenka prapanavaŭ Alaksandru Łukašenku sustrecca ŭ najbližejšy čas na terytoryi Ukrainy i razhledzieć kompleks pytańniaŭ dvuchbakovych adnosinaŭ i mižnarodnaha paradku dnia.
Svoj udzieł u pasiadžeńni Savieta kiraŭnikoŭ dziaržaŭ SND 10 kastryčnika ŭ Minsku paćvierdzili prezidenty 10 z 11 krain Sadružnaści Niezaležnych Dziaržaŭ. Ukraina budzie pradstaŭlena pasłom Michaiłam Ježalem, jaki 9 kastryčnika ŭdzielničaŭ u pasiadžeńni Savieta ministraŭ zamiežnych spraŭ krain SND.
