Zasnavalnik samaj znakamitaj pryvatnaj vajskovaj kampanii Blackwater Eryk Pryns miarkuje, što viedaje, kamu daručyć źniščeńnie «Isłamskaj dziaržavy» — najomnikam.
«Kab staraja kamanda Blackwater zachavałasia, ja całkam upeŭnieny, što vajskovaje złučeńnie pamieram u niekalki bryhadaŭ daśviedčanych amierykanskich kanktraktnikaŭ albo šmatnacyjalnaja ich hrupa mahła b być chutka sabranaja i nakiravanaja dla vyrašeńnia nieabchodnych zadač na poli boju», — zajaviŭ Pryns u svaim dopisie na sajcie kampanii Frontiers.
Kantraktniki z Blackwater achoŭvajuć Poła Bremiera, kiraŭnika časovaj amierykanskaj administracyi ŭ Iraku, mart 2004 hoda.
Eks-kiraŭnik Blackwater, viadomaj tym, što raniej jana atrymlivała ŭradavyja kantrakty na miljardy dalaraŭ i vajavała ŭ Iraku, adznačyŭ, što zaraz palityčnaje kiraŭnictva krainaŭ Zachadu vymušanaja vykarystoŭvać suprać bajevikoŭ «Isłamskaj dziaržavy» tolki avijacyju.
«Ja zaraz staŭlusia da abvieščanaha prezidentam (ZŠA) płana ŭ lepšym vypadku biez zachapleńnia. Moc amierykanskaj avijacyi siahaje daloka, adnak u rešcie reštaŭ jana nie zmoža skončyć spravu i vykarčavać «IDSŁ» z haradoŭ, dzie jany mohuć schavacca pamiž nasielnictvam», — piša Pryns.
Jon miarkuje, što ZŠA pry prezidencie Baraku Abamie «vyrvali parazu ź ziapy pieramohi», kali zanadta rana vyviali naziemnyja siły ź Iraka.
Unutrypalityčnyja mierkavańni – najpierš, niehatoŭnaść hramadzian płacić za vajnu kryvioj i biudžetnymi vydatkami - zaminajuć palitykam Zachadu pasłać u boj rehularnyja naziemnyja vojski.
Videa byłoha supracoŭnika pryvatnaj vajskovaj kampanii DynSorp pra jahonuju pracu ŭ Afhanistanie.
«Kali ŭrad nie moža sabrać dastatkova palityčnaj voli ci finansavańnia dla nakiravańnia rehularnych vojskaŭ… dazvolcie pryvatnamu siektaru darabić hetuju spravu», — kaža Pryns.
Krytyki pryvatnych vajskovych kampanij kažuć, što kantraktniki kudy horš za zvyčajnych žaŭnieraŭ kantralujucca ŭradavymi jurydyčnymi strukturami, što vyklikaje šmatlikija abvinavačańni ŭ parušeńniach pravoŭ čałavieka.
Supracoŭniki Dyncorp achoŭvajuć prezidenta Afhanistana Chamida Karzaja.
Hetak sama Blackwater była pierajmienavanaja ŭ 2009 hodzie i jašče raz u 2011, kab pazbavicca drennaha imidžu, stvoranaha incydentam u Iraku, kali najmity kampanii pamyłkova zabili 17 mirnych žycharoŭ, pryniaŭšy ich za bajevikoŭ.
Inšyja padobnyja kampanii pastupova kansalidujucca, stvarajučy vialikija pryvatnyja vajskovyja karparacyi.
Hetak vyručka hihanta siektara karparacyi G4S plc skłała ŭ 2014 hodzie kala $10 miljardaŭ, a kolkaść supracoŭnikaŭ pieravyšaje 620 000 čałaviek – što prykładna ŭ 10 razoŭ bolš za asabovy skład biełaruskaj armii.
U vieraśni hetaha hoda z zaklikam stvaryć svojeasablivy «Zamiežny Lehijon» z 25.000 dobraachvotnikaŭ, jaki mahli b padrychtavać siły śpiecyjalnych apieracyj ZŠA, vystupiŭ viadomy viadučy telekanału Fox News Bił O'Rejli.
Jon dadaŭ da vorahaŭ, ź jakimi treba zmahacca, i prezidenta Rasii Pucina. «Što zabivaje Zachad zaraz u vajnie z teroram i Pucinym, heta palityka. Ničoha nielha zrabić chutka, niemahčyma chutka sabrać siły… Tamu nieabchodnaja antyterarystyčnaja armija», - zajaviŭ O'Rejli.
