Infarmacyjny ofis «Biełaruś u fokusie» (Infarmacyjnaje biuro Salidarnaści ź Biełaruśsiu, SBIO) pravioŭ daśledavańnie biełaruskaha dziaržsiektara. Metaj jaho było vyśviatleńnie kaštoŭnaściej i čakańniaŭ zaniatych u im ludziej.
«U daśledavańni ŭdzielničała krychu bolš za sto čałaviek z usioj krainy. Byli abranyja jak zaniatyja ŭ administracyjnym aparacie, h.zn. čynoŭniki, tak i tyja, chto pracuje na pradpryjemstvach, u pieršuju čarhu mieniedžary siaredniaha źviana, — raskazvaje adzin z aŭtaraŭ pracy, mahistr palityčnych navuk Alaksandr Aŭtuška-Sikorski.
Vyniki pracy atrymalisia cikavyja.
Uvohule, absalutnaja bolšaść zaniatych u dziaržsiektary pazityŭna stavicca da siońniašniej sacyjalna-ekanamičnaj stabilnaści. Ale ž u niekatorych momantach mierkavańnie biełaruskaha čynoŭnika pryncypova adroźnivajecca ad mierkavańnia zvyčajnaha klerka.
Naprykład, čynoŭniki nie bajacca mahčymych skaračeńniaŭ ci zvalnieńniaŭ, kažučy ab svajoj niezamiennaści na pracoŭnym miescy abo zdolnaści znajści pracu ŭ inšym miescy. Supracoŭniki dziaržpradpryjemstvaŭ, u svaju čarhu, adčuvajuć ryzyki i niavyznačanaść u situacyi mahčymaj nieabchodnaści źmieny pracoŭnaha miesca.
Čynoŭniki i supracoŭniki dziaržpradpryjemstvaŭ adroźnivajucca i ŭ staŭleńni da ŭzroŭniu i jakaści žyćcia ŭ Biełarusi. Čynoŭniki, kali havorka zachodzić pra paraŭnańnie ŭzroŭniu žyćcia ŭ Biełarusi i inšych krainach, znachodziać arhumienty na karyść taho, što situacyja ŭ Biełarusi nie horš, a šmat u čym lepš, čym u inšych, u pryvatnaści, jeŭrapiejskich dziaržavach, i nastojvajuć na adnosnaści paraŭnańnia. U svaju čarhu zvyčajnyja supracoŭniki dziaržpradpryjemstvaŭ adnaznačna aceńvajuć uzrovień žyćcia ŭ Biełarusi jak nižejšy, čym u inšych krainach.
Čynoŭniki, u adroźnieńnie ad pradstaŭnikoŭ inšych prafiesij, usprymajuć svaju prafiesiju jak hramadska važnuju i značnuju. Adnak svoj uzrovień dachodu jany ličać niedastatkovym. Akramia taho, časta jany adznačajuć, što kiraŭničyja rašeńni ŭ sistemie dziaržsłužby nie ŭličvajuć ich vopytu i łakalnaj śpiecyfiki pracy, «spuskajucca źvierchu». Takim čynam, sami čynoŭniki pryznajuć, što nie majuć mahčymaści vykazać svajo mierkavańnie i paŭpłyvać na źmieny, jakija im davodzicca ŭkaraniać u pracu.
Reformy ŭsprymajucca čynoŭnikami nie jak pieraŭtvareńni z peŭnymi metami, ale jak pastajanny praces źmienaŭ zakanadaŭstva i ŭmoŭ funkcyjanavańnia dziaržaparatu, da jakich im davodzicca adaptavacca. Zdolnaść padładzicca pad hetyja źmieny, pry hetym, rasceńvajecca jak vysoki ŭzrovień prafiesijanalizmu.
Da pytańnia «pracoŭnaj mabilnaści» usie supracoŭniki dziaržsiektara staviacca z aściarohaj. Ale čynoŭnikaŭ znoŭ ža pałochajuć zusim inšyja rečy, čym astatnich. Kali čałavieka, jaki pracuje na pradpryjemstvie, ad pracoŭnaj mabilnaści ŭtrymlivajuć sacyjalna-ekanamičnyja ryzyki, to čynoŭniki, jak praviła, u jakaści pieraškody nazyvajuć kumoŭstva i kłanavaść sučasnaha dziaržaparata, a taksama dadatkovuju adkaznaść i bolš žorstkaje pakarańnie pry «pravale».
